18 ناۋرىز كۇنى رۋمىنيانىڭ ميديا پورتىندا "استانا" بۋكسيرى بەس ەكيپاج مۇشەسىمەن بىرگە سۋعا باتىپ كەتتى. وقيعا سالدارىنان ءبىر ادام قازا تاۋىپ، تاعى ءتورت ادامدى ىزدەۋ جۇمىستارى جالعاسىپ جاتىر، دەپ حابارلايدى "ادىرنا".
Report اگەنتتىگىنىڭ رۋمىنيا باق-تارىنا سىلتەمە جاساپ حابارلاۋىنشا، ەكيپاج مۇشەلەرىنىڭ ءبىرى جاعاعا جەتكىزىلگەنىمەن، ونى امان الىپ قالۋ مۇمكىن بولماعان. قازىرگى ۋاقىتتا قالعان ءتورت ادامدى ىزدەۋ وپەراتسياسى جۇرگىزىلۋدە. رۋمىنيا اسكەري-تەڭىز كۇشتەرىنىڭ باسشىلىعى ولاردىڭ قازا بولۋى مۇمكىن ەكەنىن جوققا شىعارمايدى.
وقيعا ورنىنا جەدەل جاردەم بريگادالارى، سۇڭگۋىرلەر جانە ارنايى قىزمەتتەر جىبەرىلدى.
رۋمىنيانىڭ اسكەري-تەڭىز ۆەدومستۆوسىنىڭ مالىمەتىنشە، بۋكسير "امادەس" اتتى مارشالل ارالدارىنىڭ تۋى استىنداعى تانكەردى مونبۋي تەرمينالىنا بايلاۋ كەزىندە اۋدارىلىپ كەتكەن. بۇل تەرمينال ميديا پورتىنان شامامەن 8 شاقىرىم قاشىقتىقتا ورنالاسقان.
وقيعانىڭ سەبەپتەرى مەن ءمان-جايىن انىقتاۋ ماقساتىندا تەرگەۋ جۇمىستارى پروكۋراتۋرانىڭ ۇيلەستىرۋىمەن جۇرگىزىلىپ جاتىر.
"استانا" بۋكسيرى رۋمىنيا تۋى استىندا ءجۇزىپ جۇرگەن جانە 2006 جىلى سالىنعان. كەمەنىڭ ۇزىندىعى — 26,09 مەتر، ەنى — 7,94 مەتر، ەڭ ۇلكەن شوگۋ تەرەڭدىگى — 3,85 مەتر، ال قوزعالتقىش قۋاتى — 2610 كۆت (3500 ات كۇشى).
