Qyrǧyzstan Qazaqstanmen şekaradaǧy jer telımderın teŋ därejede aiyrbastau turaly ūsynys jasady, dep habarlaidy “Adyrna” ūlttyq portaly.
Būl turaly Qyrǧyzstan prezidentınıŋ baspasöz hatşysy Asqat Alagözov mälımdedı.
Onyŋ aituynşa, Bışkek tarapy Qazaqstanǧa Toqmaq qalasy maŋyndaǧy joldyŋ 800 metrlık uchaskesıne qatysty jer almasu jönınde ūsynys joldaǧan.
Alagözovtıŋ sözınşe, atalǧan joba jüzege asqan jaǧdaida Almaty köşesınen Kemin qalasyna deiıngı ūzyndyǧy şamamen 150 şaqyrym bolatyn aqyly avtomagistral saluǧa mümkındık tuady. Jaŋa jol öŋırdegı kölık qatynasyn jaqsartuǧa baǧyttalǧan.
Qyrǧyzstan prezidentınıŋ ökılı şekarany delimitasiialau men demarkasiialau mäselelerınde Özbekstanmen aradaǧy täjıribenı mysalǧa keltırdı. Onyŋ aituynşa, jürgızılgen kelıssözder nätijesınde būryn Özbekstannyŋ Ferǧana oblysyna qaraǧan Şoŋqara jäne Taş-Töbe auyldary Qyrǧyzstan qūramyna ötken.
Qazırgı taŋda būl eldı mekenderde şamamen 2,5 myŋ adam tūrady. Tūrǧyndardyŋ basym bölıgı – etnikalyq qyrǧyzdar. Tiıstı tırkeu räsımderı aiaqtalǧannan keiın olar Qyrǧyzstan azamattyǧyn alu mümkındıgıne ie bolady.
Öz kezegınde Qyrǧyzstan Özbekstanǧa şekara maŋyndaǧy teŋ därejelı jer telımderın bergen. Sonymen qatar ekı el Batken oblysyndaǧy Sai men Taian auyldaryn bailanystyratyn jol qūrylysy üşın 236 gektar jerdı özara aiyrbastaǧan. Nätijesınde Aidarkennen Batkenge deiıngı jol ūzaqtyǧy 225 şaqyrymnan 55 şaqyrymǧa deiın qysqarmaq.
