كوكشەتاۋدا جۇرگىزۋشى كۋالىگى جوق بولا تۇرا كولىك تىزگىنىنە وتىرىپ، جاياۋ جۇرگىنشىنى قاعىپ ولتىرگەن ايەلگە قاتىستى سوت ۇكىمى جاريالاندى، دەپ حابارلايدى "ادىرنا" ۇلتتىق پورتالى.
بۇل تۋرالى قالالىق سوتتىڭ ءباسپاسوز قىزمەتى حابارلادى.
سوت ماتەريالدارىنا سايكەس، قايعىلى وقيعا 2026 جىلدىڭ 9 مامىرىندا تۇرعىن ءۇي اۋلاسىنا بۇرىلۋ كەزىندە بولعان. سوتتالۋشى س. كۇيەۋىنىڭ دەنساۋلىعى كۇرت ناشارلاعاندىقتان، ونىڭ رۇقساتىمەن كولىكتى باسقارعانىن ايتقان. الايدا بۇرىلىس كەزىندە كولىكتى يگەرە الماي، جول جيەگىمەن كەتىپ بارا جاتقان 52 جاستاعى ايەلدى قاعىپ كەتكەن.
جابىرلەنۋشى اۋىر جاراقاتتار سالدارىنان اۋرۋحانادا كوز جۇمعان. مارقۇمنىڭ 12 جاستاعى بالانى جالعىز تاربيەلەپ وتىرعانى انىقتالدى.
سوتتالۋشى ءوز كىناسىن تولىق مويىنداپ، جاساعان ىسىنە شىنايى وكىنەتىنىن جەتكىزدى. سونداي-اق جابىرلەنۋشى تاراپقا كەلتىرىلگەن ماتەريالدىق شىعىندى تولىق وتەپ، كەشىرىم سۇراعان.
جابىرلەنۋشى تاراپ سوتتالۋشىنى باس بوستاندىعىنان ايىرماۋدى سۇراپ، وعان قاتىستى ەشقانداي تالاپ-تىلەگى جوق ەكەنىن مالىمدەگەن. الايدا اتالعان قىلمىستىق قۇقىق بۇزۋشىلىق بويىنشا زاڭدا بالاما جازا قاراستىرىلماعان.
سوت ايەلدى 2 جىل 6 اي مەرزىمگە باس بوستاندىعىنان ايىرۋ جازاسىنا كەستى. سونىمەن قاتار ونىڭ اسىراۋىندا ەكى كامەلەتكە تولماعان بالاسى بار ەكەنىن ەسكەرىپ، تاعايىندالعان جازانى وتەۋ مەرزىمىن ءۇش جىلعا كەيىنگە قالدىردى.
ال كولىكتى باسقارۋ قۇقىعى جوق ادامعا كولىك قۇرالىن بەرگەنى ءۇشىن سوتتالۋشىنىڭ جۇبايىنا قاتىستى قىلمىستىق ءىس جەكە وندىرىسكە بولىنگەن.
سوت ۇكىمى زاڭدى كۇشىنە ەنگەن جوق.
كەلىسكەن رەسەي قارجىعا قاۋقارسىز بولىپ شىقتى ما؟ قازاقستان كوكشەتاۋدا ءوز بەتىمەن جەو سالۋعا كىرىستى
