Kökşetauda jürgızuşı kuälıgı joq bola tūra kölık tızgınıne otyryp, jaiau jürgınşını qaǧyp öltırgen äielge qatysty sot ükımı jariialandy, dep habarlaidy "Adyrna" ūlttyq portaly.
Būl turaly qalalyq sottyŋ baspasöz qyzmetı habarlady.
Sot materialdaryna säikes, qaiǧyly oqiǧa 2026 jyldyŋ 9 mamyrynda tūrǧyn üi aulasyna būrylu kezınde bolǧan. Sottaluşy S. küieuınıŋ densaulyǧy kürt naşarlaǧandyqtan, onyŋ rūqsatymen kölıktı basqarǧanyn aitqan. Alaida būrylys kezınde kölıktı igere almai, jol jiegımen ketıp bara jatqan 52 jastaǧy äieldı qaǧyp ketken.
Jäbırlenuşı auyr jaraqattar saldarynan auruhanada köz jūmǧan. Marqūmnyŋ 12 jastaǧy balany jalǧyz tärbielep otyrǧany anyqtaldy.
Sottaluşy öz kınäsın tolyq moiyndap, jasaǧan ısıne şynaiy ökınetının jetkızdı. Sondai-aq jäbırlenuşı tarapqa keltırılgen materialdyq şyǧyndy tolyq ötep, keşırım sūraǧan.
Jäbırlenuşı tarap sottaluşyny bas bostandyǧynan aiyrmaudy sūrap, oǧan qatysty eşqandai talap-tılegı joq ekenın mälımdegen. Alaida atalǧan qylmystyq qūqyq būzuşylyq boiynşa zaŋda balama jaza qarastyrylmaǧan.
Sot äieldı 2 jyl 6 ai merzımge bas bostandyǧynan aiyru jazasyna kestı. Sonymen qatar onyŋ asyrauynda ekı kämeletke tolmaǧan balasy bar ekenın eskerıp, taǧaiyndalǧan jazany öteu merzımın üş jylǧa keiınge qaldyrdy.
Al kölıktı basqaru qūqyǧy joq adamǧa kölık qūralyn bergenı üşın sottaluşynyŋ jūbaiyna qatysty qylmystyq ıs jeke öndırıske bölıngen.
Sot ükımı zaŋdy küşıne engen joq.
