"كەزدەسۋدىڭ جاڭا فورماتىنا بەيىمدەلمەي، ەسكى سۇرلەۋدەن شىعا الماي وتىرعاندار بار". بۇل تۋرالى پرەمەر-مينيستر ءاليحان سمايىلوۆ ۇكىمەت وتىرىسىندا ايتتى، دەپ جازادى "ادىرنا" ۇلتتىق پورتالى.
پرەمەر-مينيستر مەملەكەت باسشىسىنىڭ تاپسىرماسى بويىنشا مينيسترلەر مەن اكىمدەردىڭ حالىقپەن كەزدەسۋلەرى جاڭا فورماتقا سايكەس «جۇزبە-ءجۇز، اشىق تىلدەسۋ» تۇرىندە وتكىزىلەتىنىن اتاپ ءوتتى.
«حالىقپەن كەزدەسۋدەن سوڭ بارلىق دەڭگەيدەگى اكىمدەر پروبلەمالىق ماسەلەلەردى جۇيەلەيدى، ال ولاردى قارجىلاندىرۋ مۇمكىندىكتەرى ءماسليحات سەسسيالارىندا قارالادى»، — دەدى ءاليحان سمايىلوۆ.
ۇكىمەت باسشىسىنىڭ ايتۋىنشا، كەيبىر وڭىرلەردە كەزدەسۋدىڭ جاڭا فورماتىنا بەيىمدەلمەي، ەسكى سۇرلەۋدەن شىعا الماي وتىرعاندار دا بار. الايدا، بۇعان قاراماستان، مۇنداي شارالارعا ەركىن كىرۋ ءپرينتسيپى ساقتالۋى كەرەك.
«مەملەكەت باسشىسى “حالىق ۇنىنە قۇلاق اساتىن مەملەكەت” ءپرينتسيپىنىڭ ماڭىزدىلىعىن اتاپ كورسەتتى. ءبىز حالىقتىڭ مۇڭ-مۇقتاجىنا قۇلاق اسىپ، ولاردىڭ سىن-پىكىرلەرىن دە تىڭداي ءبىلۋىمىز كەرەك. ادامداردى كۇندەلىكتى بولىپ جاتقان قاراپايىم ماسەلەلەر الاڭداتادى. تەك وسىنداي كەزدەسۋلەردىڭ قورىتىندىسى بويىنشا عانا حالىقتىڭ تاراپىنان 30 مىڭعا جۋىق ماسەلە مەن ۇسىنىس كوتەرىلدى. بۇلاردىڭ بىردە-بىرەۋى قاراۋسىز قالماۋى ءتيىس. ادامدار وزدەرى كوتەرگەن ماسەلەلەردىڭ ناقتى شەشىمىن تاۋىپ جاتقانىن كورۋى كەرەك»، — دەدى پرەمەر-مينيستر.
مينيسترلەر مەن اكىمدەرگە حالىقپەن كەزدەسۋلەردىڭ ناتيجەلىلىگىن ارتتىرۋ تاپسىرىلدى. مۇندا پروبلەمالىق ماسەلەلەردىڭ جەدەل شەشىلۋىنە باسىمدىق بەرىپ، نىسانالى توپتارمەن تۇراقتى كەزدەسۋلەر وتكىزىپ وتىرۋ كەرەك. سونداي-اق ۇكىمەت باسشىسى مينيسترلەر مەن اكىمدەردىڭ حالىقپەن كەزدەسۋىن باعالاۋ كريتەريلەرىن ازىرلەۋدى تاپسىردى، ولاردىڭ ناتيجەلەرى ۇكىمەتتە ۇنەمى قارالىپ وتىراتىن بولادى.
"ادىرنا" ۇلتتىق پورتالى
