"Kezdesýdiń jańa formatyna beıimdelmeı, eski súrleýden shyǵa almaı otyrǵandar bar". Bul týraly Premer-Mınıstr Álıhan Smaıylov Úkimet otyrysynda aıtty, dep jazady "Adyrna" ulttyq portaly.
Premer-Mınıstr Memleket basshysynyń tapsyrmasy boıynsha mınıstrler men ákimderdiń halyqpen kezdesýleri jańa formatqa sáıkes «júzbe-júz, ashyq tildesý» túrinde ótkiziletinin atap ótti.
«Halyqpen kezdesýden soń barlyq deńgeıdegi ákimder problemalyq máselelerdi júıeleıdi, al olardy qarjylandyrý múmkindikteri máslıhat sessııalarynda qaralady», — dedi Álıhan Smaıylov.
Úkimet basshysynyń aıtýynsha, keıbir óńirlerde kezdesýdiń jańa formatyna beıimdelmeı, eski súrleýden shyǵa almaı otyrǵandar da bar. Alaıda, buǵan qaramastan, mundaı sharalarǵa erkin kirý prınıpi saqtalýy kerek.
«Memleket basshysy “halyq únine qulaq asatyn memleket” prınıpiniń mańyzdylyǵyn atap kórsetti. Biz halyqtyń muń-muqtajyna qulaq asyp, olardyń syn-pikirlerin de tyńdaı bilýimiz kerek. Adamdardy kúndelikti bolyp jatqan qarapaıym máseleler alańdatady. Tek osyndaı kezdesýlerdiń qorytyndysy boıynsha ǵana halyqtyń tarapynan 30 myńǵa jýyq másele men usynys kóterildi. Bulardyń birde-bireýi qaraýsyz qalmaýy tıis. Adamdar ózderi kótergen máselelerdiń naqty sheshimin taýyp jatqanyn kórýi kerek», — dedi Premer-Mınıstr.
Mınıstrler men ákimderge halyqpen kezdesýlerdiń nátıjeliligin arttyrý tapsyryldy. Munda problemalyq máselelerdiń jedel sheshilýine basymdyq berip, nysanaly toptarmen turaqty kezdesýler ótkizip otyrý kerek. Sondaı-aq Úkimet basshysy mınıstrler men ákimderdiń halyqpen kezdesýin baǵalaý krıterıılerin ázirleýdi tapsyrdy, olardyń nátıjeleri Úkimette únemi qaralyp otyratyn bolady.
"Adyrna" ulttyq portaly
