قۋات اۋەسباي «قازاق گازەتتەرى» جشس باس ديرەكتورىنىڭ ورىنباسارى قىزمەتىنە تاعايىندالدى، دەپ حابارلايدى "ادىرنا" ۇلتتىق پورتالى.
قۋات اۋەسباي 2007 جىلى ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىن بىتىرگەن. كەيىن ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە ماگيستراتۋرا مەن دوكتورانتۋرانى ءتامامداپ، 2025 جىلى جۋرناليستيكا ماماندىعى بويىنشا فيلوسوفيا دوكتورى (PhD) عىلىمي دارەجەسىن يەلەندى.
ەڭبەك جولىن 2005 جىلى «انا ءتىلى» رەسپۋبليكالىق گازەتىندە ءتىلشى بولىپ باستاعان. ءار جىلدارى «ايقىن» گازەتىنىڭ جامبىل وبلىسىنداعى مەنشىكتى ءتىلشىسى، مەملەكەتتىك جەر عىلىمي-وندىرىستىك ورتالىعىنىڭ باسپا جانە رەداكتسيالاۋ ءبولىمىنىڭ مەڭگەرۋشىسى، «قازاقستان جەر رەسۋرستارى» جۋرنالىنىڭ باس رەداكتورى، «اق جەلكەن» جۋرنالى باس رەداكتورىنىڭ ورىنباسارى قىزمەتتەرىن اتقاردى. سونداي-اق «حالىق ءسوزى» رەسپۋبليكالىق قوعامدىق-ساياسي گازەتىنىڭ باس رەداكتورى، قازاقستان رەسپۋبليكاسى پارلامەنتى سەناتى توراعاسى حاتشىلىعىنىڭ ساراپشىسى، ۇلتتىق مۋزەيدىڭ جۇرتشىلىقپەن بايلانىس ءبولىمىنىڭ مەڭگەرۋشىسى بولدى. كەيىن «اتىراۋ-اقپارات» جشس باس ديرەكتورىنىڭ ورىنباسارى جانە جامبىل وبلىستىق «اق جول» گازەتىنىڭ ديرەكتور – باس رەداكتورى قىزمەتتەرىن اتقاردى.
2019–2021 جىلدارى «Turkistan» حالىقارالىق گازەتىنىڭ ديرەكتورى – باس رەداكتورى بولىپ ەڭبەك ەتسە، 2023 جىلدان باستاپ «Egemen Qazaqstan» رەسپۋبليكالىق گازەتىندە ينتەرنەت-رەداكتسيا جەتەكشىسى، كەيىن باس رەداكتوردىڭ ورىنباسارى قىزمەتىن اتقاردى.
قۋات اۋەسبايدىڭ اقپارات سالاسىنداعى ەڭبەگى جوعارى باعالانىپ، «اقپارات سالاسىنىڭ ۇزدىگى» توسبەلگىسىمەن، «حالىق العىسى» جانە «ەرەن ەڭبەگى ءۇشىن» مەدالدارىمەن، سونداي-اق قازاقستان رەسپۋبليكاسى پرەزيدەنتىنىڭ العىس حاتىمەن ماراپاتتالعان.
