2026 jylǧy futboldan älem chempionatynyŋ G tobyndaǧy ekınşı tur matchynda Belgiia men İran qūramalary 0:0 esebımen teŋ tüstı, dep habarlaidy «Adyrna» tılşısı.
Kezdesu 21 mausymnan 22 mausymǧa qaraǧan tünı AQŞ-tyŋ Los-Andjeles qalasynda öttı. Bırınşı turda belgiialyqtar Mysyrdy jeŋe almaǧan bolsa, İran qūramasy Jaŋa Zelandiiamen nätijelı oiyn ötkızıp, köp gol soǧylǧan matchtyŋ qatysuşysy atanǧan edı.
Matchtyŋ 25-minutynda irandyqtar aiyp soqqysyn şeber oryndap, esep aşuǧa jaqyn boldy. Alaida şabuylşy Mehdi Taremidıŋ golyn beineqaitalau jüiesı (VAR) ofsaidqa bailanysty esepke almady.
Matchtyŋ 66-minutynda belgiialyq qorǧauşy Natan Ngoi qaqpaşymen jeke-dara şyǧuǧa ūmtylǧan irandyq şabuylşy Mehdi Taremidı ereje būzyp toqtatyp, qyzyl qaǧaz aldy. Osylaişa Belgiia kezdesudıŋ qalǧan bölıgın 10 oiynşymen ötkızdı.
Match statistikasy boiynşa Belgiia qūramasy dopqa ielık etude aiqyn basymdyq tanytyp, uaqyttyŋ 70 paiyzynda dopty baqylauynda ūstady. İrannyŋ körsetkışı — 30 paiyz. Sondai-aq belgiialyqtar qarsylas qaqpasyna 23 ret soqqy jasaǧanymen, onyŋ tek jeteuı ǧana qaqpa däldıgıne baǧyttaldy. Al irandyqtar 7 soqqy jasap, sonyŋ üşeuı qaqpaǧa däl tidı.
Qazır Belgiia men İranda 2 ūpaidan bar. Toptaǧy joldamalardyŋ taǧdyry soŋǧy turda şeşıledı. Kelesı matchta Belgiia qūramasy 27 mausymda Jaŋa Zelandiia komandasymen oinaidy, al İran sol künı Mysyr qūramasyna qarsy kezdesedı.
