2026 жылғы футболдан әлем чемпионатының G тобындағы екінші тур матчында Бельгия мен Иран құрамалары 0:0 есебімен тең түсті, деп хабарлайды «Адырна» тілшісі.
Кездесу 21 маусымнан 22 маусымға қараған түні АҚШ-тың Лос-Анджелес қаласында өтті. Бірінші турда бельгиялықтар Мысырды жеңе алмаған болса, Иран құрамасы Жаңа Зеландиямен нәтижелі ойын өткізіп, көп гол соғылған матчтың қатысушысы атанған еді.
Матчтың 25-минутында ирандықтар айып соққысын шебер орындап, есеп ашуға жақын болды. Алайда шабуылшы Мехди Таремидің голын бейнеқайталау жүйесі (VAR) офсайдқа байланысты есепке алмады.
Матчтың 66-минутында бельгиялық қорғаушы Натан Нгой қақпашымен жеке-дара шығуға ұмтылған ирандық шабуылшы Мехди Таремиді ереже бұзып тоқтатып, қызыл қағаз алды. Осылайша Бельгия кездесудің қалған бөлігін 10 ойыншымен өткізді.
Матч статистикасы бойынша Бельгия құрамасы допқа иелік етуде айқын басымдық танытып, уақыттың 70 пайызында допты бақылауында ұстады. Иранның көрсеткіші — 30 пайыз. Сондай-ақ бельгиялықтар қарсылас қақпасына 23 рет соққы жасағанымен, оның тек жетеуі ғана қақпа дәлдігіне бағытталды. Ал ирандықтар 7 соққы жасап, соның үшеуі қақпаға дәл тиді.
Қазір Бельгия мен Иранда 2 ұпайдан бар. Топтағы жолдамалардың тағдыры соңғы турда шешіледі. Келесі матчта Бельгия құрамасы 27 маусымда Жаңа Зеландия командасымен ойнайды, ал Иран сол күні Мысыр құрамасына қарсы кездеседі.
