استانا قالاسىنىڭ سارىارقا اۋدانىندا ءىرى ءورت وقيعاسى تىركەلدى. توتەنشە جاعدايلار مينيسترلىگىنىڭ مالىمەتىنشە، كەنجين كوشەسىنىڭ بويىندا جينالىپ قالعان قوقىس پەن رەزەڭكە-تەحنيكالىق بۇيىمدار تۇتانعان، دەپ حابارلايدى "ادىرنا".
ءورت ءسوندىرۋ بولىمشەلەرى شاقىرتۋ ورنىنا جەتكەن كەزدە اۋماقتىڭ اشىق جالىنمەن ورتەنىپ جاتقانى جانە كوككە قويۋ قارا ءتۇتىننىڭ كوتەرىلگەنى بەلگىلى بولدى. قارا ءتۇتىننىڭ قالىڭ بولۋىنا قويماداعى رەزەڭكە بۇيىمداردىڭ جانۋى سەبەپ بولعان.
ءورت سوندىرۋشىلەر وقيعا ورنىنا جەتە سالا جالىندى اۋىزدىقتاۋعا كىرىستى. ءتىلسىز جاۋمەن كۇرەستى ءتيىمدى جۇرگىزۋ ءۇشىن سۋدىڭ ۇزدىكسىز بەرىلۋى قامتاماسىز ەتىلدى.
قازىرگى ۋاقىتتا ماماندار ءورتتى تولىقتاي جويۋ ءۇشىن بارلىق قاجەتتى شارانى ىسكە اسىرۋدا. توتەنشە جاعدايدىڭ نەدەن شىققانى جانە وقيعانىڭ ءمان-جايى الداعى ۋاقىتتا انىقتالماق.
