اقش اكىمشىلىگىنىڭ جوعارى لاۋازىمدى وكىلى اقش پەن يران اراسىنداعى ءوزارا تۇسىنىستىك تۋرالى مەموراندۋمنىڭ جوباسىن ۇسىندى، دەپ حابارلايدى "ادىرنا" ۇلتتىق پورتالى.
قۇجات 14 نەگىزگى تارماقتان تۇرادى. وندا تاراپتار اراسىنداعى اسكەري، ساياسي جانە ەكونوميكالىق ماسەلەلەر قامتىلعان.
جوباعا سايكەس، اقش، يران جانە ولاردىڭ قازىرگى قاقتىعىستاعى وداقتاستارى بارلىق اسكەري ءىس-قيمىلداردى، ليۆان اۋماعىنداعى وپەراتسيالاردى دەرەۋ توقتاتۋعا جانە ءبىر-بىرىنە قارسى كۇش قولدانۋدان باس تارتۋعا مىندەتتەنەدى. سونداي-اق تاراپتار ءوزارا ەگەمەندىك پەن اۋماقتىق تۇتاستىقتى قۇرمەتتەپ، ىشكى ىستەرگە ارالاسپاۋعا كەلىسپەك.
قۇجاتتا 60 كۇن ىشىندە تۇپكىلىكتى كەلىسىم ازىرلەۋ، اقش-تىڭ يرانعا قاتىستى اسكەري-تەڭىز بلوكاداسىن كەزەڭ-كەزەڭىمەن الىپ تاستاۋى جانە وڭىردەگى كۇشتەرىن قىسقارتۋ كوزدەلگەن. ءوز كەزەگىندە يران پارسى شىعاناعى مەن ومان تەڭىزىندەگى كوممەرتسيالىق كەمە قاتىناسىنىڭ قاۋىپسىزدىگىن قامتاماسىز ەتۋگە مىندەتتەمە الادى.
مەموراندۋم جوباسىندا اقش-تىڭ ايماقتىق سەرىكتەستەرىمەن بىرلەسىپ يراندى قالپىنا كەلتىرۋ مەن ەكونوميكالىق دامىتۋعا باعىتتالعان كەمىندە 300 ميلليارد دوللارلىق جوسپار ازىرلەۋ نيەتى دە كورسەتىلگەن. بۇدان بولەك، يرانعا قارسى ەنگىزىلگەن حالىقارالىق جانە امەريكالىق سانكتسيالاردى الىپ تاستاۋ ماسەلەسى قاراستىرىلعان.
يادرولىق باعدارلاماعا قاتىستى بولىمدە يران يادرولىق قارۋ جاسامايتىنىن جانە يەلەنبەيتىنىن راستايدى. ال تاراپتار بايىتىلعان يادرولىق ماتەريالداردى باقىلاۋ مەن ساقتاۋ تەتىكتەرىن كەلىسسوزدەر بارىسىندا ايقىنداۋعا ۋاعدالاسقان.
سونداي-اق قۇجاتتا يراننىڭ مۇزداتىلعان قارجىلىق اكتيۆتەرىنە قول جەتكىزۋ، مۇناي ەكسپورتىنا قويىلعان شەكتەۋلەردى جەڭىلدەتۋ، كەلىسىمنىڭ ورىندالۋىن باقىلايتىن ارنايى تەتىك قۇرۋ جانە تۇپكىلىكتى قۇجاتتى بىرىككەن ۇلتتار ۇيىمى قاۋىپسىزدىك كەڭەسىنىڭ قارارىمەن بەكىتۋ ماسەلەلەرى قامتىلعان.
