Qazaqstanda para beru turaly uäde endı resmi türde qylmystyq qūqyqbūzuşylyq bolyp sanalady. Būl norma sybailas jemqorlyqqa qarsy ıs-qimyl turaly zaŋǧa engızılgen tüzetulerde qarastyrylǧan. Atalǧan zaŋǧa 12 mausym künı Prezident Qasym-Jomart Toqaev qol qoiǧan, dep habarlaidy "Adyrna"
Kursiv.kz mälımetınşe, qūjat parany uäde etu, ūsynu jäne talap etu äreketterın qylmystyq jauapkerşılıkke jatqyzady. Halyqaralyq täjıribe mūndai normalar jemqorlyqqa tözbeuşılık mädenietın qalyptastyryp, qylmystyŋ saldar keltırmei tūryp-aq aldyn aluǧa mümkındık beretının körsetedı.
Jaŋa erejeler 2027 jyldyŋ 1 qaŋtarynan bastap küşıne enedı.
Tūrmystyq jemqorlyqpen küres aiasynda auruhanalar, mektepter, universitetter, bankter jäne kommunaldyq qyzmetter qyzmetkerlerınıŋ ırı kölemde zaŋsyz syiaqy aluy nemese bopsalau arqyly alynǧan qarajatqa qatysty jauapkerşılık küşeitıldı.
Sondai-aq osyndai ūiym qyzmetkerlerıne zaŋsyz syiaqy beru üşın de qylmystyq jauapkerşılık engızıldı. Būdan bölek, Qylmystyq kodekske zaŋsyz syiaqy aluǧa itermeleu (provokasiia) üşın jaza qarastyratyn norma engızıldı.
Tengrinews.kz habarlauynşa, jaŋa zaŋ aiasynda müddeler qaqtyǧysyn aldyn alu jäne retteu tetıgı engızılıp, ony boldyrmau şaralaryn oryndamaǧany üşın jauapkerşılık belgılenedı.
Qūjat memlekettık qyzmettegı jaqyn tuystardyŋ bırge jūmys ısteuıne qatysty şekteulerdı de küşeitedı. Endı būl şekteuler tıkelei baǧynyştylyq jaǧdailarymen qatar, janama yqpal, ışkı baqylau jäne kadrlyq ısterge qatysu jaǧdailaryna da qoldanylady. Bır vedomstvoda basşynyŋ jaqyn tuystarynyŋ (sonyŋ ışınde jien, jezde, baldyz jäne basqa tuystar) bırge jūmys ısteuıne tyiym salynady.
Sonymen qatar, memlekettık qyzmetşıler jūmysqa ornalasu kezınde jaqyn tuystary turaly mälımetterdı aşuǧa mındettı bolady.
Soŋynda, sybailas jemqorlyq qūqyqbūzuşylyqtary üşın jeke tūlǧalardy äkımşılık jauapkerşılıkke tartu merzımı bır jyldan üş jylǧa deiın ūzartyldy.
