«Aq jol» demokratiialyq partiiasynyŋ töraǧasy Azat Peruaşev partiianyŋ kezektı sezı barysynda öz ökılettıgın toqtatu turaly şeşım qabyldaǧanyn mälımdedı, dep habarlaidy "Adyrna" ūlttyq portaly.
Saiasatkerdıŋ aituynşa, būl qadam partiia basşylyǧyn jaŋartu jäne ūiym ışınde monopoliianyŋ qalyptasuyna jol bermeu maqsatynda jasalyp otyr.
«Bız qazırdıŋ özınde qoǧamdaǧy özgerıster legınde ömır sürıp jatyrmyz. Alaida monopoliia jaŋa bastamalar men tyŋ ideialardyŋ damuyna kedergı keltıruı mümkın. Sondyqtan partiianyŋ jaŋaruyna mümkındık beru üşın töraǧa qyzmetınen ketu turaly şeşım qabyldadym», – dedı Azat Peruaşev.
Partiia sezınde ol töraǧalyqqa Qazaqstan Respublikasy Parlamentı Mäjılısınıŋ deputaty Daniia Espaevanyŋ kandidaturasyn ūsyndy. Peruaşev onyŋ käsıbi täjıribesı, ziiatkerlık äleuetı jäne batyl şeşım qabyldai bılu qabıletı partiianyŋ odan ärı damuyna serpın beredı degen senım bıldırdı.
«Onyŋ talanty, aqyl-parasaty jäne jaŋaşyl közqarasy partiia jūmysyna jaŋa serpın berıp, oŋ özgerıster äkeledı dep senemın», – dedı ol.
«Aq jol» demokratiialyq partiiasynyŋ kezekten tys sezınde partiianyŋ jaŋa töraǧasy bolyp Mäjılıs töraǧasynyŋ orynbasary, «Aq jol» fraksiiasynyŋ müşesı Daniia Espaeva sailandy. Ol 2016 jyldyŋ nauryz aiynan berı «Aq jol» partiiasynan Mäjılıs deputaty bolyp keledı. Al 2023 jyldyŋ nauryzynan bastap Mäjılıs töraǧasynyŋ orynbasary qyzmetın atqarǧan.
Aita keteiık, 2002 jyldyŋ 3 säuırınde "Aq jol" partiiasy ädılet organdaryna resmi türde tırkelgen. Alǧaşqyda «Aq jol» Qazaqstan demokratiialyq partiiasy qoǧamdyq bırlestıgınıŋ teŋ töraǧalary bolyp Bolat Äbılov, Älihan Bäimenov, Oraz Jandosovtar sailandy. Al 2003 jyly teŋ töraǧalar qataryna Liudmila Julanova men Altynbek Särsenbaiūly qosyldy. 2005 jyly partiia qūryltaiynda teŋ töraǧalar instituty taratylyp, partiia töraǧalyǧy Älihan Bäimenovke berıldı.
Al 2011 jyly «Aq jol» partiiasynyŋ töraǧasy bolyp bırauyzdan sol kezdegı «Atameken» palatasynyŋ basşysy Azat Peruaşev sailanǧan edı.
2019 jyly Nūrsūltan Nazarbaev prezidenttıkten ketkende közıne jas alyp, el nazaryn audarǧan Peruaşev odan keiın de özınıŋ erekşe mälımdemelerımen tanylǧan. Taiauda ǧana ol būǧan deiın Qazaqstandy «Ştrafstan» dep ataǧan mälımdemesıne qatysty tüsınık bergen.
«Ötken jyly osyndai mälımdeme jasaǧan kezde men būl sözdıŋ qate ekenın moiyndadym. Parlamentariiler sözdı abailap ärı salmaqtap aituy tiıs. Men mūny bır jyl būryn aitqanmyn. Keşe prezident tek menı ǧana emes, basqa adamdardy da synǧa aldy. Būl – jūmys, būl – ömır. Bız memleket basşysynyŋ synyn qabyldap, odan sabaq alyp, ärı qarai jūmys ısteuımız kerek», - degen Peruaşev.
Sondai-aq ol Qazaqstannyŋ «Ştrafstan» emes ekendıgın atap öttı.
«Bızdıŋ elımız – Qazaqstan, ol «Ştrafstan» emes. Bız – örkeniettı memleketpız», – dep qosqan deputat.
Peruaşev būǧan deiın käsıpkerlerge salynatyn şamadan tys ülken aiyppūldardy synau barysynda Qazaqstandy «Ştrafstan» dep ataǧan edı.
2 mausymda prezident Qasym-Jomart Toqaev Alatau qalasyn damytu jönındegı keŋeste «Ştrafstan, Aiyppūlstan» degenderdı synǧa alǧan bolatyn.
