فوتو: sxodim.com
Almaty SuperSki جوباسى زاڭنامادا قاراستىرىلعان بارلىق كەلىسۋ راسىمدەرىنەن ءوتىپ، قاجەتتى رۇقساتتاردى تولىق الدى. بۇل تۋرالى ۇكىمەتتەگى بريفينگتە تۋريزم جانە سپورت ءمينيسترى ەربول مىرزابوسىنوۆ مالىمدەدى، دەپ حابارلايدى “ادىرنا”.
«Almaty SuperSki جوباسى ەكولوگيالىق ساراپتامانى، عىلىمي تالداۋدى جانە قوعامدىق تىڭداۋلاردى قوسا العاندا، زاڭدا قاراستىرىلعان بارلىق كەلىسۋ راسىمدەرىنەن ءوتتى. قورشاعان ورتاعا، توپىراققا، سۋعا، وسىمدىكتەر مەن جانۋارلار دۇنيەسىنە، سونداي-اق ادامداردىڭ دەنساۋلىعىنا ىقتيمال اسەرلەرى زەرتتەلدى. بۇگىنگى تاڭدا بارلىق قاجەتتى رۇقساتتار الىندى دەپ ويلايمىن. سوندىقتان قازىر باستى نازار جوبانى ۋاقتىلى ىسكە اسىرۋعا اۋدارىلىپ وتىر»، – دەدى مىرزابوسىنوۆ.
ءوز كەزەگىندە Kazakh Tourism Development كومپانياسىنىڭ باس اتقارۋشى ديرەكتورى ەرجان ەركىنباەۆ كوكجايلاۋ جوباسىنىڭ كوممەرتسيالىق بولىگى تەك جەكە ينۆەستيتسيالار ەسەبىنەن سالىناتىنىن ايتتى.
«قوناقۇيلەردى، ورنالاستىرۋ ورىندارىن، تۋريستىك جانە كوممەرتسيالىق ينفراقۇرىلىمدى بيۋدجەت قاراجاتىنا سالۋ دۇرىس ەمەس»، – دەپ ەسەپتەيدى ول.
ال ينجەنەرلىك جەلىلەر، سۋمەن جابدىقتاۋ جۇيەلەرى، اسپالى جولدار مەن شاڭعى تراسسالارىنا كەلسەك، ونىڭ ايتۋىنشا، بۇلاردىڭ بارلىعى الەمنىڭ كەز كەلگەن ەلىندە مەملەكەت قارجىسى ەسەبىنەن سالىناتىن ينفراقۇرىلىمدىق جوبالار. ونىڭ سوزىنشە، قازىرگى ۋاقىتتا جوبانى دامىتۋ جۇمىستارى «بايتەرەك» جۇيەسىنىڭ ءوز قاراجاتى ەسەبىنەن جۇرگىزىلۋدە، ال مەملەكەتتىك بيۋدجەتتەن بۇل جوباعا قاراجات بولىنبەگەن.
ء«بىزدىڭ بولجامدارىمىز كورسەتكەندەي، بۇل جوبا ينفراقۇرىلىمدىق سيپاتقا يە بولعانىنا قاراماستان، تەمىرجولدار، اۆتوموبيل جولدارى نەمەسە كوپىرلەر سياقتى ۇزاق مەرزىمدى وتەلىمدى قاجەت ەتەتىن نىسانداردان ەرەكشەلەنىپ، سالىنعان ينۆەستيتسيالاردى جەتكىلىكتى تۇردە تەز قايتارادى. كوكجايلاۋ نەمەسە Almaty SuperSki ينفراقۇرىلىمدىق جوبا بولا تۇرا، ءوزىن-ءوزى اقتاۋ مەرزىمى جاعىنان ءتيىمدى»، – دەپ اتاپ ءوتتى ەركىنباەۆ.
ول جۇرگىزىلگەن ەسەپتەۋلەرگە سۇيەنە وتىرىپ، ەگەر كۋرورتقا ءبىر ميلليون شەتەلدىك تۋريست كەلىپ، ولار الماتىدا نەمەسە قازاقستاندا كەم دەگەندە ءۇش كۇن وتكىزسە، وندا ەل ەكونوميكاسىنا جىل سايىنعى تىكەلەي كىرىس كولەمى 1 ميلليارد اقش دوللارىن قۇرايتىنىن ايتتى.
