الماتى وبلىسى شامالعان اۋىلىندا ەر ادام كوشەدە كەتىپ بارا جاتقان ايەلگە شابۋىل جاسادى. ول ايەلدىڭ موينىنا ءجىپ سالىپ، بۋىندىرعان، دەپ حابارلايدى "ادىرنا".
ايەلدىڭ جاقىندارىنىڭ ايتۋىنشا، وقيعا 6 ماۋسىم كۇنى كەشكى ساعات 20:05 كەزىندە وزەن بويىنداعى جولدا بولعان. ەر ادام ايەلدى ولتىرەتىنىن ايتىپ، قورقىتىپ، ءۇنىن شىعارماۋدى تالاپ ەتكەن. جابىرلەنۋشىنى اينالادا جۇرگەن ادامدار قۇتقارىپ قالدى، الايدا كۇدىكتى قاشىپ ۇلگەرگەن. ول بەينەباقىلاۋ كامەراسىنا ءتۇسىپ قالعان. ەر ادامنىڭ جەكە باسى ءالى انىقتالعان جوق.
وقيعاعا قاتىستى قاراساي اۋدانىنىڭ اكىمدىگى رەسمي تۇسىنىكتەمە بەردى.
«قازىرگى ۋاقىتتا قازاقستان رەسپۋبليكاسى قىلمىستىق كودەكسىنىڭ 108-1-بابى 2-بولىگىنىڭ 5-تارماعى (دەنساۋلىققا قاساقانا جەڭىل زيان كەلتىرۋ) بويىنشا تىركەلگەن قىلمىستىق ءىس شەڭبەرىندە سوتقا دەيىنگى تەرگەپ-تەكسەرۋ امالدارى جۇرگىزىلىپ جاتىر»، – دەپ مالىمدەدى اۋداندىق اكىمدىكتەن.
الماتى وبلىسى پوليتسيا دەپارتامەنتىنىڭ ءباسپاسوز قىزمەتى جاعدايدى باقىلاۋعا العانىن حابارلادى. قازىرگى ۋاقىتتا وقيعانىڭ تولىق ءمان-جايىن اشۋ جانە كۇدىكتىنى ۇستاۋ ءۇشىن كەشەندى شارالار ءجۇرىپ جاتىر.
«قازىرگى ۋاقىتتا وقيعانىڭ ءمان-جايىن، سونداي-اق زاڭسىز ارەكەتتەرگە قاتىسى بار تۇلعانى انىقتاۋعا باعىتتالعان جەدەل-ىزدەستىرۋ جانە تەرگەۋ شارالارىنىڭ كەشەنى جۇرگىزىلىپ جاتىر. جۇرگىزىلگەن جۇمىستاردىڭ ناتيجەسى بويىنشا قۇقىقتىق باعا بەرىلىپ، ءتيىستى پروتسەستىك شەشىم قابىلدانادى. تەرگەۋ جالعاسۋدا»، – دەپ اتاپ ءوتتى ۆەدومستۆودان.
