قازاقستاننىڭ ساۋدا جانە ينتەگراتسيا مينيسترلىگى اقش پرەزيدەنتى دونالد ترامپتىڭ جاڭا ساۋدا تاريفتەرىنە قاتىستى جارلىعىنان كەيىن رەسمي مالىمدەمە جاسادى، دەپ حابارلايدى "ادىرنا" ۇلتتىق پورتالى.
مينيسترلىكتىڭ مالىمەتىنشە، الدىن الا جۇرگىزىلگەن تالداۋ ناتيجەسى بويىنشا قازاقستاننان اقش-قا ەكسپورتتالاتىن تاۋارلاردىڭ باسىم بولىگى قوسىمشا تاريفتىك شەكتەۋلەرگە ىلىكپەيدى. ويتكەنى بۇل ونىمدەر اقش اكىمشىلىگىنىڭ ەرەكشە جاعدايلار تىزىمىنە ەنگىزىلگەن.
ۇلتتىق ستاتيستيكا بيۋروسىنىڭ دەرەكتەرىنە سايكەس، 2024 جىلى قازاقستان مەن اقش اراسىنداعى تاۋار اينالىمى 4,2 ملرد اقش دوللارىنا جەتىپ، وتكەن جىلمەن سالىستىرعاندا 4%-عا ارتقان. قازاقستاننىڭ اقش-قا ەكسپورتى 30,6%-عا ءوسىپ، 2,0 ملرد اقش دوللارىن قۇرادى، ال اقش-تان قازاقستانعا يمپورت كولەمى 2,2 ملرد اقش دوللارىن قۇرادى.
قازاقستان اقش-قا نەگىزىنەن شيكى مۇناي، ۋران، كۇمىس، فەرروسپلاۆتار جانە باسقا دا ونىمدەردى ەكسپورتتايدى. بۇل تاۋارلار اقش پرەزيدەنتىنىڭ "تاۋارلار ساۋداسىنداعى ماڭىزدى جانە تۇراقتى تاپشىلىقتى جويۋ ماقساتىندا ءوزارا تاريفتەر ارقىلى يمپورتتى رەتتەۋ تۋرالى" جارلىعى بويىنشا ەرەكشەلىكتەر تىزىمىنە ەنگىزىلگەن. وسىلايشا، قازاقستاندىق تاۋارلاردىڭ 92%-ىنا قوسىمشا تاريفتەر قولدانىلمايدى.
قوسىمشا باج سالىعى بەلگىلى ءبىر تاۋار توپتارىنا عانا قاتىستى ەنگىزىلەدى. بۇل تاۋارلاردىڭ ەكسپورت كولەمى 2024 جىلى 95,2 ملن اقش دوللارىن قۇرادى. اتاپ ايتقاندا، فوسفور – 15,9 ملن اقش دوللارى، فەرروسيليتسي – 12,7 ملن اقش دوللارى، لينزالار – 4,1 ملن اقش دوللارى، بيداي كلەيكوۆيناسى – 4 ملن اقش دوللارى، امموني نيتراتى – 2,4 ملن اقش دوللارى
جالپى، قابىلدانعان تاريفتىك شارالار قازاقستاننىڭ اقش-قا ەكسپورتىنىڭ 4,8%-ىنا عانا اسەر ەتەدى. ۇكىمەت قازاقستانعا قاتىستى قوسىمشا باجداردى قولدانباۋ مۇمكىندىگىن تالقىلاۋ ءۇشىن اقش-پەن كەلىسسوزدەر جۇرگىزۋگە نيەتتى.
اقش پرەزيدەنتى دونالد ترامپ ء"ادىل باسەكەلەستىكتى قالپىنا كەلتىرۋ" جانە امەريكالىق وندىرۋشىلەردى قورعاۋ ماقساتىندا جاھاندىق ساۋدا تاريفتەرىن ەنگىزەتىنىن مالىمدەگەن بولاتىن. قازاقستان بۇل ساياساتقا ىلىككەن ەلدەردىڭ قاتارىنا ەندى. ەندى قازاقستاننان اقش-قا ەكسپورتتالاتىن كەيبىر ونىمدەرگە 27% مولشەرىندە باج سالىعى سالىنادى.
