ەڭبەك جانە حالىقتى الەۋمەتتىك قورعاۋ مينيسترلىگى Employment Permit System (EPS) جۇيەسى ارقىلى قازاقستان ازاماتتارىن كورەيا رەسپۋبليكاسىندا جۇمىسقا ورنالاستىرۋ ءۇشىن ىرىكتەۋ ءتارتىبىن ءتۇسىندىردى، دەپ حابارلايدى «ادىرنا» ءتىلشىسى.
پراكتيكالىق ىرىكتەۋ الماتى قالاسىندا EPS ورتالىعى اشىلعاننان كەيىن باستالماق. ورتالىقتا ۇمىتكەرلەردىڭ كورەي ءتىلىن مەڭگەرۋ دەڭگەيى EPS-TOPIK تەستى ارقىلى باعالانادى. سونىمەن قاتار ولاردىڭ كاسىبي ءبىلىمى مەن ەڭبەك داعدىلارى تەكسەرىلىپ، كورەياعا اتتانار الدىندا مىندەتتى دايىندىقتان وتەدى.
باعدارلاماعا 18 بەن 39 جاس ارالىعىنداعى قازاقستان ازاماتتارى قاتىسا الادى. ۇمىتكەردىڭ سوتتالماعان بولۋى، بۇرىن كورەيادان كۇشتەپ شىعارىلماۋى، ەلگە كىرۋگە تىيىم سالىنباۋى جانە شەتەلگە شىعۋعا شەكتەۋلەرىنىڭ بولماۋى تالاپ ەتىلەدى. ىرىكتەۋ بارىسىندا ءبىلىم دەڭگەيى، ەڭبەك ءوتىلى مەن كاسىبي سەرتيفيكاتتارى دا ەسكەرىلەدى.
بارلىق كەزەڭنەن ءساتتى وتكەن ازاماتتار رەسمي جۇمىس ىزدەۋشىلەر تىزىمىنە ەنگىزىلەدى. الايدا مينيسترلىك بۇل تىزىمگە ەنۋ كورەيادا اۆتوماتتى تۇردە جۇمىسقا ورنالاسۋعا كەپىلدىك بەرمەيتىنىن اتاپ ءوتتى. سوڭعى شەشىمدى كورەيالىق جۇمىس بەرۋشى قابىلدايدى جانە قاجەتتى قىزمەتكەردى تىركەلگەن كانديداتتاردىڭ اراسىنان ءوزى تاڭدايدى.
EPS جۇيەسى بويىنشا قازاقستان ازاماتتارىن جۇمىسقا قابىلداۋ كولەمى جىل سايىن كورەيا تاراپى بەلگىلەيتىن كۆوتاعا سايكەس انىقتالادى.
جۇمىس بەرۋشى ۇمىتكەردى تاڭداعان جاعدايدا ەڭبەك شارتى ۇسىنىلادى. قۇجاتقا قول قويماس بۇرىن قىزمەتكەرگە ەڭبەك مىندەتتەرى، جۇمىس ۋاقىتى، ەڭبەك جاعدايلارى جانە وزگە دە تالاپتار تۇسىندىرىلەدى.
باعدارلاما اياسىندا جۇمىس ىستەۋ مەرزىمى ءۇش جىلعا دەيىن بەلگىلەنەدى. قولدانىستاعى زاڭناماعا سايكەس بۇل مەرزىم قوسىمشا ءبىر جىل ون ايعا دەيىن ۇزارتىلۋى مۇمكىن.
مينيسترلىك ازاماتتاردى تەك رەسمي اقپارات كوزدەرىنە سەنۋگە شاقىرىپ، جۇمىسقا ورنالاستىرۋعا كەپىلدىك بەرەمىز نەمەسە ىرىكتەۋدەن تىس وتكىزەمىز دەپ ۋادە بەرەتىن دەلدالدارعا اقشا مەن قۇجات تاپسىرماۋعا كەڭەس بەردى.
تىركەۋدىڭ باستالۋ مەرزىمى، قۇجات قابىلداۋ ءتارتىبى، EPS-TOPIK تەستىنىڭ وتكىزىلۋ ۋاقىتى جانە ىرىكتەۋدىڭ وزگە كەزەڭدەرى تۋرالى اقپارات مينيسترلىكتىڭ رەسمي رەسۋرستارىندا قوسىمشا جاريالانادى.
