بۇگىن «تازا قازاقستان» ەكولوگيالىق باعدارلاماسى اياسىندا «جاسىل جەلەك» رەسپۋبليكالىق اعاش ەگۋ اكتسياسى ءوتتى. مەملەكەت باسشىسى قاسىم-جومارت توقاەۆتىڭ قاتىسۋىمەن تەلەكوپىر بايلانىسى ارقىلى وتكەن شارا ەلىمىزدىڭ بارلىق ءوڭىرىن قامتىدى. وسى كۇنى جەتىسۋ وبلىسىندا اكتسياعا 15 مىڭ ادام قاتىسىپ، 8 مىڭنان استام اعاش ەگىلدى.
وسى كۇنى تالدىقورعانداعى ورتالىق باسسەين الاڭىنداعى اعاش وتىرعىزۋ شاراسىنا وبلىس اكىمى بەيبىت يساباەۆ جانە جاستار ۇيىمدارىنىڭ وكىلدەرى، ەكو-بەلسەندىلەر قاتىستى. سپورت نىسانىنىڭ الدىنا 150 كوشەت ەگىلدى.
ءوڭىر باسشىسى اكتسياعا كەلگەن جاستارمەن اڭگىمەلەسىپ، ولارمەن پىكىر الماستى.
- بۇگىنگى جاستاردىڭ ءوز-ءوزىن دامىتۋعا مۇمكىندىگى كوپ. قازىر بىلىمدىلەردىڭ زامانى. گادجەتتەردى نەعۇرلىم پايدالى، ءتيىمدى جاعىنان پايدالانۋ كەرەك. اسىرەسە تىلدەردى ۇيرەنۋگە، ءىت-تەحنولوگيانى مەڭگەرۋگە كوبىرەك كوڭىل بولسەڭىزدەر، ونىڭ بولاشاقتا يگىلىگىن كورەسىزدەر، - دەدى ب. يساباەۆ.
وبلىستىق ەنەرگەتيكا جانە تۇكش باسقارماسىنىڭ مالىمەتىنشە، وبلىس كولەمىندە اكتسياعا مەكەمە-ۇيىمدار قىزمەتكەرلەرى، كوممۋنالدىق قىزمەتتەر، كاسىپورىندار، ەلدى مەكەندەر تۇرعىندارى، ەكو-بەلسەندىلەر، ەرىكتىلەر مەن جاستار جالپى سانى 15 مىڭ ادام قاتىسىپ، 125 تەحنيكا جۇمىلدىرىلعان، 8 مىڭنان استام اعاش وتىرعىزىلدى.
تالدىقورعانداعى اكتسياعا قاتىسۋشى جاستار پىكىر ءبىلدىردى.
- تالدىقورعان يندۋستريالدى كوللەدجىنىڭ 1-كۋرس ستۋدەنتىمىن. بۇعان دەيىن تەكەلى قالاسىندا دا وسىنداي تازالىق جانە اعاش ەگۋ شاراسىنا قاتىسقانبىز. وزىمە قوعامدىق جۇمىستارعا قاتىسقان ۇنايدى. مۇنداي شارالاردا جاستار ءبىر-بىرىمەن ارالاسىپ، تانىسىپ، جاقسى ورتا تابامىز. ءارى تابيعاتقا قامقورلىق جاساۋعا بىرلەسىپ جۇمىلامىز. بۇل ءبىزدى ۇيىمشىلدىققا، ەكولوگيالىق مادەنيەتىمىزدى قالىپتاستىرۋعا كومەكتەسەدى، - دەىد دارحان جۇماەۆ.
اعاش ەگۋگە جاستار ۇيىمدارىندا بەلسەندىلىك تانىتىپ جۇرگەن وقۋشىلار دا بار.
- مەن ەكى جىلدان بەرى Unisef جاستار ۇيىمىنىڭ مۇشەسىمىن. ءوزىم نازارباەۆ زياتكەرلىك مەكتەبىندە 10-سىنىپتا وقيمىن. ءبىز بالالاردىڭ قۇقىعىن قورعاۋ باعىتىندا اقپاراتتاندىرۋمەن اينالىسامىز. «Jetisu Jastary» ۇيىمىمەن بىرگە وسىنداي ەكولوگيالىق اكتسيالاردا بەلسەندىمىز. ءبىزدىڭ ەكو-ۆولونتەرلىق تۋرالى ارنايى كۋرستارىمىز بار، مۇشەلەرىمىزدى سول كۋرستارلا وقىتامىز. ياعني ءار ەكو-ۆولونتەر ءوزىنىڭ بىلگەنىن باسقالارعا دا ايتىپ، جەتكىزىپ، بىلىمىمەن ءبولىسىپ ۇيرەتەدى، - دەيدى نۇراي قوجەكەنوۆا.
اتاپ وتسەك، وسى كۇنى استانادا «KazEcoPatrol» قوعامدىق بىرلەستىگىنىڭ ۆولونتەرى داۆيد ۆيرگكي پرەزيدەنتتىڭ قولىنان العىس حات الدى.
