6 ماۋسىمدا فۋتبولدان قازاقستان ۇلتتىق قۇراماسى ارمەنياعا قارسى جولداستىق كەزدەسۋ وتكىزەدى، دەپ حابارلايدى "ادىرنا" ۇلتتىق پورتالى.
ماتچ ارمەنيا استاناسى ەرەۆانداعى ۆازگەن ساركيسيان اتىنداعى رەسپۋبليكالىق ستاديوندا وتەدى. كەزدەسۋ قازاقستان ۋاقىتىمەن ساعات 19:00-دە باستالىپ، «Qazsport» تەلەارناسىنان تىكەلەي ەفيردە كورسەتىلەدى.ەكى قۇراما بۇعان دەيىن سەگىز رەت كەزدەسكەن. ونىڭ التاۋىندا ارمەنيا قۇراماسى جەڭىسكە جەتسە، ءبىر ويىن تەڭ اياقتالعان. قازاقستان قۇراماسى قارسىلاسىن ءبىر مارتە عانا جەڭگەن.
باس باپكەر ءالي اليەۆ الداعى ويىندارعا شاقىرىلعان ويىنشىلار ءتىزىمىن جاريالادى. قۇراما ساپىندا تەمىرلان اناربەكوۆ، الەكساندر زارۋتسكي، بەكحان شايزادا سىندى قاقپاشىلار، سونداي-اق نۇرالى ءالىپ، يان ۆوروگوۆسكي، الىبەك قاسىم، سەرگەي مالىي باستاعان قورعاۋشىلار بار.
جارتىلاي قورعاۋ شەبىندە يسلامبەك قۋات، سەرىكجان مۋجيكوۆ، رامازان ورازوۆ جانە باسقا دا فۋتبولشىلار ونەر كورسەتسە، شابۋىل شەبىندە ماكسيم سامورودوۆ، يسلام چەسنوكوۆ، عالىمجان كەنجەبەك، داستان ساتپاەۆ سىندى ويىنشىلارعا سەنىم ارتىلىپ وتىر. قازاقستان قۇراماسى ارمەنيامەن كەزدەسۋدەن كەيىن 9 ماۋسىمدا ماجارستان قۇراماسىنا قارسى تاعى ءبىر جولداستىق ماتچ وتكىزەدى. كەزدەسۋ سىرت الاڭدا وتەدى.
