مەملەكەت باسشىسى ەلورداداعى «اتامەكەن» ەتنومەموريالدى كەشەنىندە وتكەن مەملەكەتتىك تۋ كوتەرۋ راسىمىنە قاتىستى، دەپ حابارلايدى "ادىرنا".
ءراسىم بارىسىندا پرەزيدەنت قازاقستاننىڭ تاريحي دامۋى مەن مەملەكەتتىلىك داستۇرلەرى جونىندە پىكىر ءبىلدىردى. ونىڭ ايتۋىنشا، قازىرگى قازاقستانداعى بەرىك ورنىققان پرەزيدەنتتىك باسقارۋ ۇلگىسىنىڭ باستاۋى التىن وردا كەزەڭىندەگى ساياسي جۇيەمەن ساباقتاس.
"قازىر قازاقستاندا بەرىك ورنىققان پرەزيدەنتتىك باسقارۋ ۇلگىسى التىن وردا كەزىندە قۇرىلعان ساياسي جۇيەدەن باستاۋ الادى", - دەدى پرەزيدەنت.
مەملەكەت باسشىسى جاڭا كونستيتۋتسيادا قازاق ەلىنىڭ ءتول شەجىرەسى ۇلى دالانىڭ مىڭداعان جىلدىق تاريحىمەن تىعىز بايلانىستى ەكەنى ايقىن كورسەتىلگەنىن اتاپ ءوتتى.
پرەزيدەنتتىڭ ايتۋىنشا، التىن وردا ءوز داۋىرىندە دامىعان باسقارۋ ينستيتۋتتارى، ديپلوماتيالىق قىزمەتى، ساۋدا جانە كەدەن جۇيەسىمەن ەرەكشەلەنگەن. ول سونداي-اق تاريحي مۇرا قازىرگى قازاقستاننىڭ مەملەكەتتىك دامۋىنا اسەر ەتەتىن ماڭىزدى فاكتور ەكەنىن جەتكىزدى.
"التىن وردانىڭ ەڭ باستى مۇراسى – ونىڭ مىزعىماس قۇندىلىقتارى. سەبەبى الىپ مەملەكەتتە ءدىنى، ءتىلى، مادەنيەتى، ءداستۇرى بولەك ادامدار ورتاق ەرەجەلەر اياسىندا تاتۋ-ءتاتتى ءومىر ءسۇردى. بابالارىمىزدىڭ وسىنداي تاعىلىمدى جولى ءبىز ءۇشىن وشپەس ونەگە جانە باستى ستراتەگيالىق باعدار بولىپ قالا بەرەدى", - دەدى.
