Бакуде Үндістан үкіметінің этностық азшылықтарға қатысты репрессиялық саясатына арналған «1984 жылғы маусым, Амритсар оқиғалары: геноцид контексіндегі Үндістанның этностық азшылықтарға қарсы трансұлттық қуғын-сүргіні» атты халықаралық конференция басталды. Бұл туралы Report агенттігі жазды, деп хабарлайды «Адырна» тілшісі.
Іс-шараны Баку бастамашыл тобы ұйымдастырған.
Конференцияға Канада, Ұлыбритания, Нидерланд, Германия, Швейцария, Австралия және АҚШ-тағы сикх қауымдастықтарының өкілдері, сараптамалық орталықтардың жетекшілері, адам құқықтары мен этностық азшылықтар мәселелері бойынша сарапшылар, сондай-ақ Үндістан үкіметінің репрессиялық, нәсілшілдік сипаттағы және қудалау саясатының тікелей құрбандары, соның ішінде далиттер қауымының өкілдері қатысуда.
Талқылаулар барысында Үндістан үкіметінің этностық және діни азшылықтарға, әсіресе сикхтар мен далиттерге қарсы жүргізіп отырған трансұлттық репрессиялары мен жүйелі қудалау саясатын халықаралық ұйымдардың күн тәртібінде сақтау мәселелері қаралады деп күтілуде.
Сондай-ақ репрессиядан зардап шеккен диаспоралық ұйымдар арасындағы үйлестірілген ынтымақтастықты нығайту, трансұлттық қудалаудан құқықтық қорғаудың бірлескен тетіктерін күшейту және халықаралық алаңдардағы ортақ іс-қимылдарды дамыту мәселелері бойынша пікір алмасу жоспарланған.
