الماتىدا «جاسىل ەل» جاستار ەڭبەك جاساقتارىنىڭ جاڭا ماۋسىمى سالتاناتتى تۇردە اشىلدى. بيىل جوبا اياسىندا 2100 جاس پەن ءجاسوسپىرىمدى جۇمىسپەن قامتۋ جوسپارلانىپ وتىر.
اشىلۋ راسىمىنە الماتى قالاسى جاستار ساياساتى باسقارماسىنىڭ وكىلدەرى، جاستار ۇيىمدارى، ەڭبەك جاساقتارىنىڭ مۇشەلەرى، ەرىكتىلەر جانە قالا جاستارى قاتىستى.
الماتى قالاسى جاستار ساياساتى باسقارماسىنىڭ باسشىسى ازيز كاجدەنبەك مەملەكەت باسشىسى قاسىم-جومارت كەمەلۇلى توقاەۆتىڭ جاستاردى قولداۋ، ەكولوگيالىق جاۋاپكەرشىلىكتى ارتتىرۋ جانە قوعامدا تازالىق مادەنيەتىن قالىپتاستىرۋعا ەرەكشە ءمان بەرىپ وتىرعانىن جەتكىزدى.
«پرەزيدەنتتىڭ باستاماسىمەن جۇزەگە اسىرىلىپ جاتقان جالپىۇلتتىق «تازا قازاقستان» اكتسياسى ازاماتتاردىڭ ەكولوگيالىق ساناسىن جاڭعىرتۋعا باعىتتالعان ماڭىزدى جوبا. بۇل باستاما تەك تازالىق ماسەلەسىمەن شەكتەلمەيدى. ول قورشاعان ورتاعا جاۋاپكەرشىلىكپەن قاراۋ مادەنيەتىن، ەڭبەككە قۇرمەتتى، تۋعان جەرگە سۇيىسپەنشىلىكتى جانە قوعامعا پايدا كەلتىرۋگە دەگەن ۇمتىلىستى قالىپتاستىرادى.
وسىعان بايلانىستى الماتى قالاسىنىڭ اكىمدىگى جاستاردى جان-جاقتى قولداۋعا ەرەكشە نازار اۋدارىپ كەلەدى. باستى ماقساتىمىز – جاستارعا مۇمكىندىك جاساۋ، ولاردى ەڭبەككە، قوعامدىق ومىرگە تارتۋ جانە الەۋمەتتىك جاۋاپكەرشىلىك سەزىمىن قالىپتاستىرۋ.
«جاسىل ەل» جوباسى وسى ماقساتتارعا قول جەتكىزۋدەگى ەڭ ءتيىمدى باستامالاردىڭ ءبىرى. ول جاستارعا العاشقى ەڭبەك تاجىريبەسىن جيناقتاۋعا، تۋعان قالاسىن كوركەيتۋگە جانە ەكولوگيالىق مادەنيەتتى دامىتۋعا ۇلەس قوسۋعا مۇمكىندىك بەرەدى»، – دەدى ازيز كاجدەنبەك.
بۇگىندە الماتى ەلىمىزدەگى جاستار سانى ەڭ كوپ قالا سانالادى. مۇندا 769 مىڭنان استام جاس تۇرادى. ونىڭ ىشىندە 472,8 مىڭى – جۇمىس ىستەيتىن جاستار، 307,8 مىڭنان استامى – جوعارى وقۋ ورىندارى مەن كوللەدجدەردىڭ ستۋدەنتتەرى، ال شامامەن 80 مىڭى – جوعارى سىنىپ وقۋشىلارى.
2005 جىلدان بەرى جۇزەگە اسىرىلىپ كەلە جاتقان «جاسىل ەل» جوباسى جاستاردى ەڭبەككە باۋلۋعا، ەكولوگيالىق سانانى ارتتىرۋعا جانە ولاردى قوعامدىق پايدالى جۇمىستارعا تارتۋعا باعىتتالعان.
جوبا جەتەكشىسى ەرداۋلەت جۇنىسبەكتىڭ ايتۋىنشا، جازعى ماۋسىمدا ەڭبەك جاساقتارىنىڭ مۇشەلەرى قالانى كوگالداندىرۋ، قوعامدىق كەڭىستىكتەردى كوركەيتۋ، اۋماقتاردى سانيتارلىق تازالاۋمەن اينالىسىپ، ەكولوگيالىق اكتسيالارعا قاتىسادى.
«كوپتەگەن جاس ءۇشىن «جاسىل ەل» العاشقى ەڭبەك مەكتەبىنە اينالادى. مۇندا ولار تاجىريبە جيناپ قانا قويماي، جاۋاپكەرشىلىككە، تارتىپكە جانە بەلسەندى ازاماتتىق ۇستانىمعا ۇيرەنەدى»، – دەدى ەرداۋلەت جۇنىسبەك.
ايتا كەتۋ كەرەك، 2025 جىلى الماتى «جاسىل ەل» جوباسىن جۇزەگە اسىرۋ بويىنشا ەلىمىزدەگى ۇزدىك ءوڭىر دەپ تانىلدى. وتكەن ماۋسىمدا جوبا اياسىندا 2100 جاس جۇمىسپەن قامتىلدى. سونىمەن قاتار العاش رەت كوللەدج ستۋدەنتتەرى مەن NEET ساناتىنداعى جاستار كەڭىنەن تارتىلدى.
جاڭا ەڭبەك ماۋسىمى 30 قىركۇيەككە دەيىن جالعاسادى. جوباعا 14 پەن 35 جاس ارالىعىنداعى مەكتەپ وقۋشىلارى، ستۋدەنتتەر جانە جۇمىسسىز جاستار قاتىسا الادى. بارلىق قاتىسۋشى ارنايى «جاسىل ەل» فورماسىمەن قامتاماسىز ەتىلەدى.
ۇيىمداستىرۋشىلار بيىل جوبا اياسىندا قاتىسۋشىلار اياسىن كەڭەيتىپ، ەكولوگيالىق جانە قوعامدىق باستامالاردىڭ سانىن ارتتىرۋدى جوسپارلاپ وتىر.
