الماتىدا ەر ادام 11 جاستاعى قىزدى زورلاعان، دەپ حابارلايدى "ادىرنا" ۇلتتىق پورتالى.
ەر ادام تاپا-تال تۇستە بەلگىسىز ۇيگە كىرىپ، ەشكىمنىڭ جوق ەكەنىن پايدالانىپ، 11 جاستاعى قىزدى زورلاعان. سول كۇنى قىزدىڭ اناسى جۇمىسىنا ەرتەرەك شىعىپ كەتكەن. ۇلكەن قىزى مەكتەپكە كەتكەن.
قىز بالا ەر ادام كەتكەن سوڭ بىردەن اناسىنا حابارلاسقان.
«ماعان قىزىم حابارلاسىپ، ۇيگە بەلگىسىز ەر ادامنىڭ كەلگەنىن ايتتى. ايعايلاماس ءۇشىن اۋزىن جاپقان. جەرگە جاتقىزىپ، شەشىندىرگەن. ءىسىن بىتىرگەن سوڭ، «رەنجىمە» دەپ قولىن ءسۇيىپ، ەشكىمگە ايتپا دەپ قورقىتىپ، كەتىپ قالعان»، - دەيدى قىزدىڭ اناسى.
اناسى قىزىنىڭ وسى وقيعادان كەيىن ەشكىممەن سويلەسپەيتىنىن، شوشىپ قالعانىن ايتادى.
ايەل ادام ۇيگە ەكى اپتا بۇرىن كوشىپ كەلگەن. ايىنا 70 مىڭ تەڭگە تولەپ تۇرادى. كۇدىكتىنى وتباسى مۇشەلەرىنىڭ ەشقايسى تانىمايدى. قازىر كۇدىكتى ۇستالعان.
«ءۇيدىڭ ەسىگى اشىق تۇرعان. قىز بالا ۇيدە جالعىز بولعان. كۇدىكتىگە قارسىلىق كورسەتە الماعان. وقيعا ورنىنا جەدەل-تەرگەۋ توبى جىبەرىلدى. ساراپتاما تاعايىندالدى. قازىر كۇدىكتى ۋاقىتشا ۇستاۋ يزولياتورىنا قامالعان. كامەلەتتىك جاسقا تولماعان بالانى زورلاۋ فاكتىسى بويىنشا قىلمىستىق ءىس قوزعالدى. ەگەر ونىڭ كىناسى دالەلدەنسە ءومىر بويىنا باس بوستاندىعىنان ايىرىلۋى مۇمكىن»، - دەدى الماتى پوليتسياسى دەپارتامەنتىنىڭ ءباسپاسوز حاتشىسى سالتانات ازىربەك.
