قازاقستان يراننىڭ يادرولىق باعدارلاماسىنا قاتىستى ماسەلەنى شەشۋگە تەحنيكالىق قولداۋ كورسەتۋگە دايىن. بۇل تۋرالى سىرتقى ىستەر مينيسترلىگىنىڭ رەسمي وكىلى ەرلان جەتىباەۆ مالىمدەدى، دەپ حابارلايدى «ادىرنا» ءتىلشىسى.
ء«بىز بۇل باعىتتاعى مىندەتتەمەلەرىمىزدى راستاپ، ىزگى نيەت نەگىزىندە تەحنيكالىق كومەك كورسەتۋگە دايىن ەكەنىمىزدى بىلدىردىك. الايدا مۇنىڭ ءبارى ءتيىستى ماسەلەلەردىڭ شەشىلۋىنە جانە بارلىق تاراپتاردىڭ كەلىسىمىنە بايلانىستى»، – دەدى ول.
ايتۋىنشا، قازاقستان يراننىڭ يادرولىق باعدارلاماسىنا قاتىستى كوپجاقتى كەلىسسوزدەر بارىسىن مۇقيات قاداعالاپ وتىر.
«ەلىمىز جاۋاپتى كوپجاقتى ىنتىماقتاستىق قاعيداتتارىن ۇستانادى جانە تۇراقتىلىقتى، قاۋىپسىزدىكتى جانە ديالوگتى نىعايتۋعا باعىتتالعان بارلىق باستامالاردى قولدايدى»، – دەدى ءسىم وكىلى.
جەتىباەۆ سونداي-اق قازاقستان اۋماعىندا ورنالاسقان تومەن بايىتىلعان ۋران بانكىنە توقتالدى. ونىڭ ايتۋىنشا، بۇل بانك حالىقارالىق اتوم ەنەرگياسى اگەنتتىگىنە تيەسىلى جانە يادرولىق قارۋدى تاراتپاۋ جونىندەگى جاھاندىق رەجيمدى نىعايتۋعا ەلەۋلى ۇلەس قوسىپ كەلەدى. ودان بولەك، ول بەيبىت ماقساتتاعى يادرولىق باعدارلامالار ءۇشىن يادرولىق وتىننىڭ كەپىلدى جەتكىزىلۋىن قامتاماسىز ەتەتىن قوسىمشا تەتىك بولىپ سانالادى.
بۇعان دەيىن Financial Times گازەتىنە بەرگەن سۇحباتىندا اتوم ەنەرگياسى جونىندەگى حالىقارالىق اگەنتتىكتىڭ باس ديرەكتورى رافاەل گروسسي اقش پەن يران يادرولىق باعدارلاما بويىنشا كەلىسىمگە كەلگەن جاعدايدا قازاقستان يراننىڭ ۋران قورىن قابىلداۋعا دايىن ەكەنىن ايتقان بولاتىن. گروسسيدىڭ سوزىنشە، ول بۇل ماسەلەنى قازاقستان پرەزيدەنتى قاسىم-جومارت توقاەۆپەن استاناعا ساپارى بارىسىندا تالقىلاعان.
اڭگىمە 60 پايىزعا دەيىن بايىتىلعان شامامەن 440 كەلى ۋران تۋرالى بولىپ وتىر. ونىڭ بولاشاعى اقش پەن يران اراسىنداعى كەلىسسوزدەردەگى ەڭ كۇردەلى ماسەلەلەردىڭ ءبىرى سانالادى. اقش پرەزيدەنتى دونالد ترامپ بۇل ماتەريالدى يران اۋماعىنان شىعارۋدى تالاپ ەتسە، تەگەران ۋران قورىن بەرمەيتىنىن اشىق مالىمدەگەن.
Financial Times باعالاۋىنشا، يراندىق ۋران 90 پايىزعا دەيىن بايىتىلعان جاعدايدا شامامەن 10 يادرولىق قارۋ جاساۋعا جەتكىلىكتى ماتەريال الۋعا بولادى.
گروسسي قازاقستاندا ماگاتە قامقورلىعىمەن قۇرىلعان تومەن بايىتىلعان ۋران بانكى جۇمىس ىستەپ تۇرعانىن اتاپ ءوتىپ، ەلدە يادرولىق ماتەريالداردى قاۋىپسىز ساقتاۋعا قاجەتتى ينفراقۇرىلىم بار ەكەنىن ايتتى.
رافاەل گروسسي قازاقستانعا 25–27 مامىر ارالىعىندا ساپارمەن كەلىپ، قاسىم-جومارت توقاەۆپەن يادرولىق قاۋىپسىزدىك سالاسىنداعى حالىقارالىق كۇن ءتارتىبىنىڭ وزەكتى ماسەلەلەرىن تالقىلاعان ەدى. كەزدەسۋ بارىسىندا توقاەۆ قازاقستاننىڭ ءتيىستى حالىقارالىق كەلىسىمدەر بولعان جاعدايدا عانا جانە تەك ىزگى نيەت نەگىزىندە يراننىڭ يادرولىق باعدارلاماسىنا قاتىستى جاعدايدى رەتتەۋگە جاردەمدەسۋگە دايىن ەكەنىن راستادى.
