18 اقپان كۇنى انكارادا تۇركيا پرەزيدەنتى رەجەپ تايىپ ەردوعان ۋكراينا پرەزيدەنتى ۆلاديمير زەلەنسكيمەن كەزدەسۋ وتكىزدى، دەپ حابارلايدى “ادىرنا” ۇلتتىق پورتالى.
Anadolu اگەنتتىگىنىڭ مالىمەتىنشە، كەلىسسوز باستالماس بۇرىن ەردوعان ۋكراينالىق ارىپتەسىن پرەزيدەنتتىك كەشەننىڭ كىرەبەرىسىندە قارسى الدى.
ەكى ەلدىڭ ليدەرلەرى تۇركيا مەن ۋكراينا تۋىنىڭ الدىندا ەستەلىك فوتوعا ءتۇستى. كەزدەسۋ باسپاسوزدەن جابىق تۇردە ءوتتى.
تۇركيا تاراپىنان كەلىسسوزدەرگە سىرتقى ىستەر ءمينيسترى حاكان فيدان، ۇلتتىق قورعانىس ءمينيسترى ياشار گيۋلەر، پرەزيدەنت اكىمشىلىگىنىڭ بايلانىس باسقارماسىنىڭ باسشىسى فاحرەتتين التۋن جانە پرەزيدەنتتىڭ سىرتقى ساياسات جانە قاۋىپسىزدىك ماسەلەلەرى بويىنشا باس كەڭەسشىسى اكيف چاگاتاي كىلىچ قاتىستى.
ەكىجاقتى كەزدەسۋدەن كەيىن مەملەكەت باسشىلارى دەلەگاتسيا مۇشەلەرىمەن بىرگە كەشكى استى ءىشتى. سونداي-اق ىنتىماقتاستىق تۋرالى كەلىسىمدەرگە قول قويۋ ءراسىمى مەن پرەزيدەنتتەردىڭ بىرلەسكەن ءباسپاسوز ءماسليحاتى بولدى.
الدىمەن، تۇركيانىڭ ۇلتتىق ءبىلىم ءمينيسترى يۋسۋف تەكين مەن ۋكراينا سىرتقى ىستەر ءمينيسترى اندرەي سيبيگا ەكى ەل اراسىنداعى ءبىلىم سالاسىنداعى ىنتىماقتاستىق تۋرالى كەلىسىمگە قول قويدى. ال ەكىنشى كەلىسىمدە تۇركيا رەسپۋبليكاسىنىڭ پرەزيدەنتتىك اكىمشىلىگىنىڭ بايلانىس باسقارماسى مەن ۋكراينا مادەنيەت جانە ستراتەگيالىق كوممۋنيكاتسيالار مينيسترلىگى اراسىندا باق جانە كوممۋنيكاتسيالار سالاسىنداعى ىنتىماقتاستىق تۋرالى ءوزارا تۇسىنىستىك تۋرالى مەموراندۋمعا قول قويىلدى.
