اقش پرەزيدەنتى دونالد ترامپ اق ءۇيدىڭ احۋالدىق ورتالىعىندا وتكەن كەڭەستەن كەيىن يرانمەن ىقتيمال كەلىسىمگە قاتىستى تۇپكىلىكتى شەشىم قابىلداعان جوق. بۇل تۋرالى The New York Times جازدى، دەپ حابارلايدى «ادىرنا» ءتىلشىسى.
باسىلىم ماتەريالىندا اقش اكىمشىلىگىنىڭ جوعارى لاۋازىمدى وكىلى كەلتىرىلگەن اقپارات بەرىلگەن. ونىڭ ايتۋىنشا، جيىن شامامەن ەكى ساعاتقا سوزىلعان. اكىمشىلىك ىشىندە تاراپتار كەلىسىمگە جاقىن دەگەن پىكىر بار، الايدا كەيبىر ماسەلە ءالى دە تالقىلانۋدا. ولاردىڭ قاتارىندا يران اكتيۆتەرىن بۇعاتتان بوساتۋ ماسەلەسى دە بار.
پەنتاگون باسشىسى كەلىسسوزدەر ءساتسىز اياقتالعان جاعدايدا اقش يرانعا قايتادان سوققى بەرۋگە دايىن ەكەنىن مالىمدەدى.
ەسكە سالايىق، ترامپ 29 مامىردا يرانعا قاتىستى ماسەلەلەر بويىنشا تۇپكىلىكتى شەشىم قابىلداناتىن كەڭەس وتەتىنىن مالىمدەگەن ەدى. ول سونداي-اق اقش يران پورتتارىنا سالىنعان تەڭىز بلوكاداسىن الىپ تاستايتىنىن ايتقان. ونىڭ پىكىرىنشە، ورمۇز بۇعازى ەشقانداي الىمسىز، ەكى باعىتتا دا ەركىن تەڭىز قاتىناسى ءۇشىن دەرەۋ اشىلۋى ءتيىس.
ترامپ يراننىڭ بايىتىلعان يادرولىق ماتەريالى اقش تاراپىنان تەگەرانمەن جانە حالىقارالىق اتوم ەنەرگياسى اگەنتتىگىمەن بىرلەسىپ الىنىپ، جويىلاتىنىن ءتۇسىندىردى. ال يران سىرتقى ىستەر مينيسترلىگىنىڭ رەسمي وكىلى يسمايل باگاي تەگەران ۆاشينگتونمەن حابار الماسۋدى جالعاستىرىپ جاتقانىن، بىراق قاقتىعىستى توقتاتۋ جونىندە ناقتى كەلىسىم ءالى جاسالماعانىن مالىمدەدى. ول يراننىڭ قازىرگى تاڭدا اسكەري قاقتىعىستى توقتاتۋعا باسىمدىق بەرىپ وتىرعانىن، ال يادرولىق باعدارلاماعا قاتىستى ماسەلەلەر ازىرگە تالقىلانبايتىنىن تاعى دا راستادى.
