ارمەنيا پرەمەر-ءمينيسترى نيكول پاشينيان مامىر ايىنىڭ سوڭىندا ارمەنياعا قاتىستى قابىلدانعان ەۋرازيالىق ەكونوميكالىق وداقتىڭ (ەاەو) شەشىمىن سىنعا الدى. ۇكىمەت وتىرىسىندا سويلەگەن سوزىندە ول ءوز قاتىسۋىنسىز قابىلدانعان مالىمدەمەنىڭ ءمانىن ءتۇسىنۋ قاجەت ەكەنىن ايتتى, دەپ حابارلايدى "ادىرنا".
«ارىپتەستەرىمنىڭ مەنىڭ قاتىسۋىمسىز قابىلداعان مالىمدەمەسىنە قاتىستى سۇراقتارىم بار. كەز كەلگەن ەاەو مۇشەسى ەشقانداي نەگىزسىز باسقا مەملەكەتكە قاتىستى وسىنداي شەشىم قابىلداي الا ما؟ ەگەر بۇعان جاۋاپ ء"يا" بولسا، وندا ەاەو ءوزىن-ءوزى تاراتۋ تۋرالى جاريالاعانمەن تەڭ. ءبىز ۇيىمنىڭ بار-جوعىن ناقتى ءتۇسىنۋىمىز كەرەك. ەگەر ەاەو جۇمىس ىستەپ تۇرسا، سوعان سايكەس ۇستانىمىمىز بولادى. ال ەگەر ءىس جۇزىندە جوق بولسا، وندا ەرەكشە ۇستانىم ۇستانۋدىڭ قاجەتى دە جوق»، – دەدى پاشينيان.
سونىمەن قاتار ارمەنيا پرەمەر-ءمينيسترى رەسەيدىڭ ارميان ونىمدەرىنىڭ يمپورتىنا جانە ارمەنيادان باسقا ەاەو ەلدەرىنە رەسەي اۋماعى ارقىلى ەكسپورتتالاتىن تاۋارلارعا ەنگىزگەن شەكتەۋلەرىنە دە توقتالدى.
ونىڭ ايتۋىنشا، بۇل جاعداي ەاەو-عا مۇشە بىرقاتار مەملەكەتتە الاڭداۋشىلىق تۋعىزۋى مۇمكىن.
«ەۋرازيالىق ەكونوميكالىق وداق ەڭبەك كۇشى، تاۋارلار، قىزمەتتەر مەن كاپيتالدىڭ ەركىن قوزعالىسى قاعيداتىنا نەگىزدەلگەن. ەگەر بۇل قاعيداتتار ساقتالماسا، وندا ەاەو-نىڭ دا ءمانى قالمايدى»، – دەدى ول.
ەسكە سالايىق، 29 مامىردا وتكەن ەاەو جوعارى كەڭەسىنىڭ وتىرىسىنا نيكول پاشينيان قاتىسپاعان بولاتىن. سول جيىندا رەسەي، قازاقستان، بەلارۋس جانە قىرعىزستان پرەزيدەنتتەرى ارمەنيانى ەۋرازيالىق ەكونوميكالىق وداق پەن ەۋروپالىق وداق اراسىندا تاڭداۋ جاساۋ جونىندە رەفەرەندۋمدى مۇمكىندىگىنشە تەزىرەك وتكىزۋگە شاقىرعان مالىمدەمە قابىلدادى. سونداي-اق ارمەنيانىڭ ەاەو-داعى مۇشەلىگى ماسەلەسىن ۇيىمنىڭ كەلەسى وتىرىسىندا قايتا قاراۋ تۋرالى شەشىم قابىلداندى.
بۇعان قوسا، رەسەيدىڭ ۆەتەرينارلىق جانە فيتوسانيتارلىق قاداعالاۋ قىزمەتى (روسسەلحوزنادزور) مامىردىڭ سوڭى مەن ماۋسىم ايىنىڭ باسىنان باستاپ ارمەنيادان گۇل، قىزاناق، قيار، بۇرىش، كوك شوپتەر، قۇلپىناي، شيە، ورىك، الحورى، شابدالى، ءجۇزىم، كارتوپ، كەپتىرىلگەن جەمىستەر، سونداي-اق ءتىرى بالىق پەن بالىق ونىمدەرىن اكەلۋگە كەزەڭ-كەزەڭىمەن شەكتەۋ ەنگىزدى.
بۇعان دەيىن نيكول پاشينيان رەسەيدىڭ كەيبىر ارميان ونىمدەرىنىڭ يمپورتىنا تىيىم سالۋىن ساياسيلاندىرىلعان شەشىم دەپ باعالاعان بولاتىن.
