23-27 مامىردا اقش اكىمشىلىگىنىڭ ۆەدومستۆوارالىق دەلەگاتسياسى قازاقستان، قىرعىزستان، وزبەكستان جانە تاجىكستاندا بولادى. بۇل تۋرالى اقش مەملەكەتتىك دەپارتامەنتىنىڭ سايتىندا ايتىلعان، دەپ حابارلايدى “ادىرنا” ۇلتتىق پورتالى.
دەلەگاتسيانى مەملەكەتتىك حاتشىنىڭ وڭتۇستىك جانە ورتالىق ازيا ىستەرى بويىنشا كومەكشىسى دونالد لۋ باسقارادى جانە ونىڭ قۇرامىندا رەسەي مەن ورتالىق ازيا بويىنشا ۇلتتىق قاۋىپسىزدىك كەڭەسىنىڭ اعا ديرەكتورى ەريك گرين، قورعانىس مينيسترلىگى مەن حالىقارالىق دامۋ اگەنتتىگىنىڭ (USAID) جوعارى لاۋازىمدى تۇلعالارى بار.
امەريكالىقتار ءتورت ەلدىڭ بيلىك، ازاماتتىق قوعام جانە ىسكەر توپ وكىلدەرىمەن كەزدەسەدى.
كەلىسسوزدەر بارىسىندا ەكونوميكالىق جانە قاۋىپسىزدىك سالاسىنداعى ىنتىماقتاستىق، «ورتاق قۇندىلىقتاردى» قولداۋ، جەرگىلىكتى مادەنيەت، ايەلدەر قۇقىعى، ازىق-تۇلىك قاۋىپسىزدىگى، اۋعانستاننان كەلگەن بوسقىندارعا كومەك كورسەتۋ ماسەلەلەرى تالقىلانادى.
قازاقستاندا ەل بيلىگى دايىنداپ جاتقان رەفورمالاردىڭ كۇن ءتارتىبىن تالقىلاۋ جوسپارلانۋدا.
”ادىرنا” ۇلتتىق پورتالى
