الماتىداعى اتموسفەرالىق اۋانىڭ جاعدايى تەك «قازگيدرومەت» رمك-نىڭ باقىلاۋ بەكەتتەرىنەن الىنعان مالىمەتتەر نەگىزىندە جۇرگىزىلەدى. بۇل قىزمەتتىڭ بارلىق قۇرىلعىسى سەرتيفيكاتتالعان، مەملەكەتتىك تىزىمگە ەنگىزىلگەن جانە مىندەتتى تەكسەرۋدەن وتكەن. بۇل تۋرالى الماتىنىڭ ەكولوگيا جانە قورشاعان ورتا باسقارماسى مالىمدەدى، دەپ حابارلايدى "ادىرنا".
قالا اۋماعىندا 16 ستاتسيونارلىق باقىلاۋ بەكەتى ورناتىلعان. وسى بەكەتتەردىڭ دەرەكتەرى بويىنشا اۋا ساپاسىنىڭ كورسەتكىشتەرى قولدانىستاعى سانيتارلىق-گيگيەنالىق نورماتيۆتەرگە سايكەس قالىپتاستىرىلادى.
بۇل رەتتە، ءتۇرلى جەكەمەنشىك نەمەسە كاليبرلەنبەگەن قۇرىلعىلار تاراتاتىن اقپارات رەسمي بولىپ سانالمايدى. مۇنداي داتچيكتەردىڭ جارامدى سەرتيفيكاتى جوق، ولار تەكسەرۋدەن وتپەگەن جانە مەملەكەتتىك ولشەۋ قۇرالدارى تىزىمىنە ەنگىزىلمەگەن. سوندىقتان مۇنداي قۇرالداردان الىنعان اقپاراتتى سەنىمدى دەرەك رەتىندە قولدانۋعا بولمايدى.
قازگيدرومەت مالىمەتىنشە، بيىل 24-25 قاراشادا جوعارى (10 شرك-دان جوعارى) جانە اسا جوعارى (50 شرك-دان جوعارى) لاستانۋ دەڭگەيى تىركەلمەگەن. جەكەلەگەن بەكەتتەردە كەيبىر زاتتار بويىنشا 1,0-2,1 شرك شاماسىندا ءبىر رەتتىك ازداعان اسۋ بايقالدى.
قالاداعى قازىرگى ءتۇتىن قۇبىلىستارى اۋا رايىنىڭ قولايسىز مەتەورولوگيالىق جاعدايلارىمەن قاتار انتروپوگەندىك فاكتورلارعا دا بايلانىستى. سونىڭ ءبىرى ينۆەرسيا، ياعني جىلى اۋا قاباتى تومەنگى سۋىق قاباتتى جاۋىپ، تىك باعىتتا اۋا الماسۋىنا كەدەرگى كەلتىرەتىن قۇبىلىس.
قاراشانىڭ جەلسىز اۋا رايى، كوپجىلدىق باقىلاۋمەن سالىستىرعاندا جوعارى تەمپەراتۋرا، جاۋىن-شاشىننىڭ بولماۋى جانە جىلىتۋ ماۋسىمىنىڭ بەلسەندىلىگى اتموسفەرادا زياندى زاتتاردىڭ جينالۋىنا ىقپال ەتەدى. لاستاۋشى كوزدەر جەكە تۇرعىن ۇيلەر، وندىرىستىك نىساندار جانە قالا اۋماعىندا پايدالانىلاتىن شامامەن ءبىر ميلليونعا جۋىق اۆتوكولىك.
بۇگىندە الماتىنىڭ اۋا باسسەينىن نەگىزگى لاستاۋشى — اۆتوكولىك (شىعارىندىلاردىڭ 60%-ىنا دەيىن). قالعان بولىگى ونەركاسىپتىك كاسىپورىندارعا، جەكە سەكتورعا جانە قاتتى وتىن پايدالاناتىن مونشاعا تيەسىلى. سوندىقتان ولاردىڭ اسەرىن تومەندەتۋ باعىتىندا ناقتى شارالار قابىلداۋ قاجەتتىلىگى تۋىنداپ وتىر. وسى ماقساتتا الماتى قالاسى اكىمدىگى ءتيىستى جۇمىستار جۇرگىزىپ، اتموسفەرالىق اۋانى قورعاۋ ەرەجەلەرىنىڭ جوباسىن ازىرلەدى. بۇل ەرەجەلەر تومەن شىعارىندىلى ايماقتا اۆتوكولىك پايدالانۋعا شەكتەۋلەر ەنگىزۋدى، ءۇشىنشى ساناتتاعى كاسىپورىنداردىڭ ەكولوگيالىق رەتتەلۋىن جانە اۋاعا زياندى زاتتار شىعارىندىلارىن ازايتۋعا باعىتتالعان باسقا دا نورمالاردى قامتيدى.
