پوليتسەيلەر ناۋرىز ايىنىڭ باسىندا الماتى ماڭىندا بولعان جاپپاي توبەلەستىڭ 17 قاتىسۋشىسىن ۇستادى. كۇدىكتىلەردەن 12 اتىس قارۋى مەن 8 اۆتوكولىك تاركىلەندى دەپ حابارلايدى الماتى وبلىسىنىڭ پوليتسيا دەپارتامەنتىنە سىلتەمە جاساعان "ادىرنا" ءتىلشىسى.
وقيعا 7 ناۋرىز كۇنى قاراساي اۋدانىنداعى شامالعان اۋىلى ماڭىندا تىركەلىپ، 30-عا جۋىق جاس جىگىتتىڭ ءوزارا قارىم قاتىناستى شەشۋ ءۇشىن جۇدىرىق پەن قارۋ قولدانعان. وقيعا ورنىنان 30 جاستاعى ەر ادام وق جاراقاتىمەن اۋرۋحاناعا جەتكىزىلدى.
ال پوليتسەيلەر اتاپ وتكەندەي، ءتارتىپ ساقشىلارىنىڭ ارالاسۋىنان كەيىن اتىس سالدارى بارىنشا ازايتىلدى. بەلگىلى بولعانداي، جانجالداسۋشى تاراپتار پوليتسياعا بىرنەشە رەت وق اتىپ، وقيعا ورنىنان كەتىپ قالعان.
وقيعا ورنىندا كريمينولوگتار ۆينتوۆكا، تەگىس ۇڭعىلى جانە تراۆماتيكالىق قارۋلاردىڭ كوپتەگەن گيلزالارىن جانە قاراۋسىز قالعان ءۇش كولىكتى تاپتى.
"بۇگىنگى تاڭدا 17 ادام ۇستالدى، 16-سى قاماۋعا الىندى، بىرەۋى ۇيقاماققا الىندى. سونداي-اق تاعى ءۇش قاتىسۋشى انىقتالىپ، مەملەكەتارالىق ىزدەۋگە جاريالاندى. قاتىسۋشىلاردان ءارتۇرلى كاليبردەگى 12 اتىس قارۋى تاركىلەندى. سونداي-اق سەگىز كولىك تاركىلەنىپ، قاجەتتى ساراپتامادان وتكىزىلىپ، ارنايى تۇراققا ورنالاستىرىلدى»، - دەپ حابارلادى الماتى وبلىسى پوليتسيا دەپارتامەنتىنىڭ ءباسپاسوز قىزمەتى.
كۇدىكتىلەرگە بىرنەشە باپتار بويىنشا ايىپ تاعىلىپ وتىر – «اتىس قارۋىن قولدانىپ بۇزاقىلىق جاساۋ»، «قۇقىق قورعاۋ ورگانى قىزمەتكەرىنىڭ ومىرىنە قول سۇعۋ»، «كىسى ولتىرۋگە وقتالۋ». ءتارتىپ ساقشىلارى قالعان قاتىسۋشىلاردى انىقتاۋ جانە ىزدەۋ جۇمىستارىن جالعاستىرۋدا.
