قازاقستاندا ترانسكاسپي حالىقارالىق كولىك باعىتىن دامىتۋ اياسىندا جۇزەگە اسىرىلىپ جاتقان ماڭىزدى ينفراقۇرىلىمدىق جوبالاردىڭ ءبىرى – "مويىنتى – قىزىلجار" جاڭا تەمىرجول جەلىسىنىڭ قۇرىلىسى قارقىندى جالعاسۋدا. قۇرىلىس بارىسى ۇكىمەتتىڭ تۇراقتى باقىلاۋىندا، دەپ حابارلايدى "ادىرنا".
ۇزىندىعى 300 شاقىرىمنان اساتىن جاڭا تەمىرجول جەلىسى قاراعاندى جانە ۇلىتاۋ وبلىستارى اۋماعى ارقىلى ءوتىپ، مويىنتى مەن قىزىلجار ستانتسيالارىن بايلانىستىرادى. بۇل ۋچاسكە ترانسكاسپي حالىقارالىق كولىك باعىتىنىڭ نەگىزگى بولىكتەرىنىڭ ءبىرى سانالادى. جاڭا جەلى ىسكە قوسىلعاننان كەيىن جۇك تاسىمالىنىڭ قاشىقتىعى 149 شاقىرىمعا قىسقارادى، مويىنتى – جارىق ۋچاسكەسىندەگى جۇكتەمە ازايادى، كونتەينەرلىك پويىزداردىڭ قوزعالىس جىلدامدىعى ارتىپ، قازاقستاننىڭ ەكسپورتتىق جانە ترانزيتتىك الەۋەتى كۇشەيەدى.
قازىرگى تاڭدا نەگىزگى جەر جۇمىستارىنىڭ 90 پايىزدان استامى اياقتالدى. رەلس پەن شپال توسەۋ جۇمىستارى 40 پايىزعا ورىندالعان. كوپىرلەر، قۇبىرلار، جول وتكەلدەرى جانە مال وتكەلدەرى سەكىلدى نىسانداردى سالۋ مەن مونتاجداۋ جۇمىستارىنىڭ 65 پايىزدان استامى بىتكەن.
جوبانى جۇزەگە اسىرۋعا وننان استام مەردىگەر ۇيىم تارتىلعان. قۇرىلىس جۇمىستارى تاۋلىك بويى جۇرگىزىلۋدە. نىساندا 1700-دەن استام مامان مەن 670-تەن اسا تەحنيكا جۇمىس ىستەپ جاتىر.
جوسپارعا سايكەس، تەمىرجول جەلىسىن پايدالانۋعا بەرۋ اعىمداعى جىلعا جوسپارلانعان.
