اباي اۋدانىندا «تازا قازاقستان – بۇل ءبىزدىڭ برەندىمىز» اتتى جاستاردىڭ ەكولوگيالىق اكتسياسى ءوتتى. جاس بەلسەندىلەر بيزنەس وكىلدەرىمەن بىرلەسىپ، «تازا قازاقستان» سيمۆوليكاسى بەينەلەنگەن ارنايى ستيكەرلەردى ءبىر رەت پايدالانىلاتىن ستاقاندارعا، كوفەحانالاردىڭ قاپتامالارىنا، فاستفۋد ورىندارى مەن ساۋدا نىساندارىنىڭ ونىمدەرىنە جاپسىردى.
ۇيىمداستىرۋشىلاردىڭ ايتۋىنشا، باستامانىڭ باستى ماقساتى — ەكولوگيا تاقىرىبىن ءار تۇرعىننىڭ كۇندەلىكتى ءومىرىنىڭ اجىراماس بولىگىنە اينالدىرۋ.
«جاستار رۋحى» جاستار قاناتىنىڭ جەتەكشىسى لاۋرا دۇيسەنوۆا اكتسيانىڭ ماقساتى ادامدارعا تازالىقتىڭ ماڭىزىن كۇندەلىكتى قولداناتىن قاراپايىم زاتتار ارقىلى ەسكە سالۋ ەكەنىن ايتتى.
— ءبىز ەكولوگيانى ءومىرىمىزدىڭ اجىراماس بولىگىنە اينالدىرعىمىز كەلدى. ءبىر رەتتىك كوفە ستاقانى نەمەسە تاعام قاپتاماسى — كۇن سايىن كوزىمىز تۇسەتىن دۇنيەلەر. ءبىزدىڭ مىندەتىمىز — ءار تۇرعىن قولىنا كوفە نە جەڭىل اس ۇستاپ تۇرعان ساتتە ءوز قالاسى مەن تۇتاس ەلدىڭ تازالىعى تۋرالى ويلانسا ەكەن دەگەن نيەت بولدى، — دەپ اتاپ ءوتتى ول.
ۇيىمداستىرۋشىلاردىڭ پىكىرىنشە، «تازا قازاقستان» جوباسى الدەقاشان قاراپايىم سەنبىلىكتەر اياسىنان شىعىپ، الەۋمەتتىك جاۋاپكەرشىلىك پەن ازاماتتىق ۇستانىمنىڭ سيمۆولىنا اينالعان.
ەكولوگيالىق باستاماعا جەرگىلىكتى بيزنەس وكىلدەرى دە قولداۋ ءبىلدىردى. كوفەحانالار، دۇكەندەر مەن جەتكىزۋ قىزمەتتەرىنىڭ يەلەرى ءوز ونىمدەرىنە ەكولوگيالىق ستيكەرلەر ورنالاستىرۋ يدەياسىن قولداعان.
كاسىپكەر يۋري كوتوۆ قالا تازالىعى ءار ادامنىڭ جەكە جاۋاپكەرشىلىگىنەن باستالاتىنىن اتاپ ءوتتى.
— «تازا قازاقستان» — جاي عانا جازۋ ەمەس، بۇل ءبىزدىڭ قالاعا، تابيعاتقا جانە بولاشاققا دەگەن كوزقاراسىمىزدىڭ بەلگىسى. قالانىڭ تازالىعى ءار ادامنان باستالادى، ەڭ باستىسى — قوقىس تاستاماۋ ادەتىن قالىپتاستىرۋ، — دەدى كاسىپكەر.
اباي اۋدانىنىڭ جاستارى تۇرعىنداردى كوشەلەردىڭ تازالىعىن ساقتاۋعا، قورشاعان ورتاعا ۇقىپتى قاراۋعا جانە ەلدىڭ ورتاق بولاشاعى ءۇشىن ءار ادامنىڭ ۇلەسى ماڭىزدى ەكەنىن ۇمىتپاۋعا شاقىردى.
