جامبىل اۋدانىندا رەسپۋبليكالىق «تازا قازاقستان» ەكولوگيالىق اكتسياسى بەرەكەسىمەن باستاۋ الىپ، اۋقىمىن كەڭەيتە ءتۇستى. بۇگىن اۋدان اكىمى ەرلان قىدىرالىۇلى اۋداننىڭ زيالى قاۋىمىمەن جانە جاستارمەن بىرگە اۋدان ورتالىعى اسا اۋىلىنداعى ورتالىق الاڭدا تازالىق جۇمىستارىنا دەن قويىپ، مەملەكەت باسشىسىنىڭ اۋماقتاردى اباتتاندىرۋ، كوگالداندىرۋ جونىندە بەرگەن تاپسىرماسىنا وراي ءوڭىر تۇرعىندارىنا ۇندەۋىن جاريالادى.
ەكولوگيالىق اكتسيا اياسىندا اۋداننىڭ ورتالىق الاڭىنداعى تالدار اكتەلىپ، دەمالىس ورىندارى سىرلانۋدا جانە ساندىك اعاشتار وتىرعىزىلۋدا.
جامبىل اۋدانى اۋماعىندا بيىل 5 000 ءتۇپ اعاش كوشەتتەرىن وتىرعىزۋ جوسپارلانسا، بۇگىنگە دەيىن جالپى سانى 3 257 ءتۇپ اعاش ەگىلدى. ونىڭ ىشىندە 350 ءتۇپ ارشا، 350 ءتۇپ تۋيا، 1800 ءتۇپ قاراعاش، 227 ءتۇپ قوراز تالدار بار.
اۋدان ورتالىعىنداعى مەكەمەلەردىڭ عيماراتتارى اينالاسىندا دا تازالىق جانە كورىكتەندىرۋ جۇمىستارى جۇرگىزىلىپ، اۋدان ارداگەرلەرى مەن جاستارى ورتالىق اباي كوشەسىنىڭ بويىن رەتكە كەلتىرىپ، قاپتالىنداعى ارىقتاردى تازالادى.
جالپىحالىقتىق ەكولوگيالىق اكتسيا جامبىل اۋدانىنداعى بارلىق 42 ەلدى مەكەندە جالعاسىن تاۋىپ وتىر.
سونىمەن قاتار، اكتسيا اياسىندا ۇرپاقتار ساباقتاستىعىن جالعاۋدى مۇرات تۇتقان جامبىل اۋدانىنىڭ ارداگەرلەرى اۋدان جاستارىن تارتا وتىرىپ، ۇرپاقتار ساباقتاستىعى رەتىندە اۋدانداعى 20 ەڭبەك ارداگەرلەرىنىڭ اۋلالارىنداعى كوكتەمگى ەگىن جۇمىستارىنا قول ۇشىن بەردى.
ولار وزدەرىمەن بىرگە جۇمىس قۇرالدارىن الا كەلىپ، باسپانا اۋلالارىن كۇل-قوقىستان تازارتتى، ءۇي ىرگەسىندەگى ءتالىمى جەردى كوكتەمگى ەگىسكە دايىنداۋ ماقساتىندا اۋدارىپ، تىرمالاپ، سۋ جۇرەتىن ارىق-اتىزداردى تارتىپ بەردى.
«اتادان مال قالعانشا، تال قالسىن» دەگەن سيپاتتى ءسوزدى ساناعا تۇيگەن اقساقالدار مەن جاستار اۋلا ىشىنە 50 ءتۇپ جەمىس جانە 50 ساندىك اعاش كوشەتتەرىن وتىرعىزدى.
اعا بۋىن مەن كەيىنگى ۇرپاق سوناۋ اتا-بابادان جەتكەن ەڭبەك ءداستۇرىن وسىلاي دارىپتەپ، ۇرپاقتار ساباقتاستىعىن پاش ەتتى. ىزگىلىك جولى بارلىق ەلدى مەكەندەردە جالعاسۋدا.
