اقش پەن يران الدىن الا جاسالعان كەلىسىم اياسىندا ورمۇز بۇعازىنداعى جۇمىستى 30 كۇن ىشىندە تولىق كولەمدە قايتا قالپىنا كەلتىرۋگە ۋاعدالاستى. بۇل تۋرالى Washington Post جازدى، دەپ حابارلايدى «ادىرنا» ءتىلشىسى.
ء«وزارا تۇسىنىستىك تۋرالى مەموراندۋمعا قول قويىلعاننان كەيىن يران ورمۇز بۇعازىنداعى جۇمىستى بىردەن قايتا باستايدى جانە 30 كۇن ىشىندە سوعىسقا دەيىنگى دەڭگەيگە جەتكىزۋ ءۇشىن ترافيكتىڭ قايتا قالپىنا كەلۋىن قامتاماسىز ەتۋ شارالارىن قابىلدايدى»، – دەپ جازدى باسىلىم.
سونداي-اق Washington Post گازەتى اقش پەن يران اتىستى توقتاتۋ رەجيمىن تۇپكىلىكتى كەلىسىمنىڭ نۇسقاسىن پىسىقتاۋ ءۇشىن 60 كۇنگە ۇزارتۋعا الدىن الا كەلىسكەنىن حابارلايدى.
«اقش پەن يران اتىستى توقتاتۋدى 60 كۇنگە ۇزارتاتىن ءوزارا تۇسىنىستىك جونىندەگى رامالىق مەموراندۋم ازىرلەدى»، – دەلىنگەن ماقالادا.
ودان بولەك، اقش مەملەكەتتىك حاتشىسى ماركو رۋبيو اقش-تىڭ يرانمەن يادرولىق ماسەلە بويىنشا ۋاقىتشا كەلىسىمگە كەلۋ مۇمكىندىگى جوعارى ەكەنىن مالىمدەدى.
«قازىر يادرولىق ماسەلە بويىنشا شەكتەۋلى مەرزىمدى كەلىسسوزدەرگە قاتىسۋ ءۇشىن وتە جاقسى ۇسىنىس ۇستەلدە تۇر. ءبىز وعان قول جەتكىزەمىز دەپ ۇمىتتەنەمىن»، – دەدى رۋبيو Reuters اگەنتتىگىنە سىلتەمە جاسالعان مالىمەتتە.
اقش يرانمەن ديپلوماتيالىق جولمەن رەتتەۋدىڭ بارلىق مۇمكىندىگىن قولدانۋعا نيەتتى ەكەنىن دە اتاپ ءوتتى.
«ديپلوماتياعا بارلىق مۇمكىندىك بەرىلەدى، سودان كەيىن عانا بالاما نۇسقالارعا جۇگىنەمىز»، – دەدى مەملەكەتتىك حاتشى.
