AQŞ pen İran aldyn ala jasalǧan kelısım aiasynda Ormūz būǧazyndaǧy jūmysty 30 kün ışınde tolyq kölemde qaita qalpyna keltıruge uaǧdalasty. Būl turaly Washington Post jazdy, dep habarlaidy «Adyrna» tılşısı.
«Özara tüsınıstık turaly memorandumǧa qol qoiylǧannan keiın İran Ormūz būǧazyndaǧy jūmysty bırden qaita bastaidy jäne 30 kün ışınde soǧysqa deiıngı deŋgeige jetkızu üşın trafiktıŋ qaita qalpyna keluın qamtamasyz etu şaralaryn qabyldaidy», – dep jazdy basylym.
Sondai-aq Washington Post gazetı AQŞ pen İran atysty toqtatu rejimın tüpkılıktı kelısımnıŋ nūsqasyn pysyqtau üşın 60 künge ūzartuǧa aldyn ala kelıskenın habarlaidy.
«AQŞ pen İran atysty toqtatudy 60 künge ūzartatyn özara tüsınıstık jönındegı ramalyq memorandum äzırledı», – delıngen maqalada.
Odan bölek, AQŞ memlekettık hatşysy Marko Rubio AQŞ-tyŋ İranmen iadrolyq mäsele boiynşa uaqytşa kelısımge kelu mümkındıgı joǧary ekenın mälımdedı.
«Qazır iadrolyq mäsele boiynşa şekteulı merzımdı kelıssözderge qatysu üşın öte jaqsy ūsynys üstelde tūr. Bız oǧan qol jetkızemız dep ümıttenemın», – dedı Rubio Reuters agenttıgıne sılteme jasalǧan mälımette.
AQŞ İranmen diplomatiialyq jolmen retteudıŋ barlyq mümkındıgın qoldanuǧa niettı ekenın de atap öttı.
«Diplomatiiaǧa barlyq mümkındık berıledı, sodan keiın ǧana balama nūsqalarǧa jügınemız», – dedı memlekettık hatşy.
