استانا اكىمدىگى جانىنداعى كامەلەتكە تولماعانداردىڭ ىستەرى جانە ولاردىڭ قۇقىقتارىن قورعاۋ جونىندەگى كوميسسيا وتىرىسىندا جازعى كانيكۋل كەزەڭىندە بالالاردىڭ قاۋىپسىزدىگى، قايعىلى جاعدايلاردىڭ الدىن الۋ جانە مەكتەپ وقۋشىلارىنىڭ دەمالىسىن ۇيىمداستىرۋ ماسەلەلەرى تالقىلاندى. جيىن استانا اكىمىنىڭ ورىنباسارى ەسەت بايكەننىڭ توراعالىعىمەن ءوتتى.
جازعى كانيكۋل قارساڭىندا ەلوردادا بالالاردىڭ مەكتەپتەر مەن اۋلالارداعى، سونداي-اق دەمالىس كەزىندەگى جانە سۋ ايدىندارى ماڭىنداعى قاۋىپسىزدىگى ماسەلەلەرىنە ەرەكشە كوڭىل ءبولىنىپ وتىر.
قالا اكىمىنىڭ تاپسىرماسى بويىنشا 2025 جىلى استانا سۋ ايدىندارىنداعى قاۋىپسىزدىك جۇيەسى كۇشەيتىلدى، ەندى بەينەباقىلاۋ كامەرالارى رەسمي دە، رۇقسات ەتىلمەگەن جاعاجايلارعا دا ورناتىلدى.
بۇگىنگى تاڭدا جابدىقتاردى ورناتۋ جۇمىسى اياقتالىپ، كامەرالار بىرىڭعاي ۆيدەومونيتورينگ پلاتفورماسىنا قوسىلادى.
ناتيجەسىندە، رەسمي جانە رۇقسات ەتىلمەگەن جاعاجايلاردى قوسا العاندا، قالانىڭ 42 نىسانى 175 بەينەباقىلاۋ كامەراسىمەن قامتىلدى.
نەگىزگى باعىتتاردىڭ ءبىرى – ءبىلىم بەرۋ ۇيىمدارىنداعى قاۋىپسىزدىك جۇيەسىن كۇشەيتۋ. استانا قالاسىنىڭ تسيفرلاندىرۋ جانە مەملەكەتتىك قىزمەت باسقارماسى باسشىسىنىڭ ورىنباسارى بەكسۇلتان قۋاندىقتىڭ ايتۋىنشا، 2025 جىلى قالانىڭ 122 مەكتەبىندە 1940 بەينەباقىلاۋ كامەراسى ورناتىلىپ، 834 كامەراعا ۆيدەوساراپتاما جۇيەسى ەنگىزىلگەن.
جوبانىڭ ەكىنشى كەزەڭىندە بيىل تاعى 1940 كامەرا مەن 100 دابىل تۇيمەسىن ورناتۋ، سونداي-اق 1668 كامەراعا ۆيدەوساراپتاما ەنگىزۋ جوسپارلانىپ وتىر. 2027 جىلى مەكتەپتەردە قوسىمشا تاعى 100 دابىل تۇيمەسى ورناتىلىپ، ۆيدەوساراپتاما جۇيەسى 2500 كامەرانى قامتيدى.
وسىلايشا، جوبانى ىسكە اسىرۋ قورىتىندىسى بويىنشا ەلوردانىڭ مەملەكەتتىك مەكتەپتەرىندە استانا قالالىق پوليتسيا دەپارتامەنتىنىڭ جەدەل باسقارۋ ورتالىعىنا (جبو) جالعانعان 5820 جاڭا جانە 6960 قولدانىستاعى بەينەباقىلاۋ كامەراسى جۇمىس ىستەيتىن بولادى.
وتىرىستىڭ تاعى ءبىر بولىگى جاز مەزگىلىندە بالالاردىڭ جاراقات الىپ قالۋ ماسەلەسىنە ارنالدى. ەلوردالىق تجد ازاماتتىق قورعانىس باسقارماسى باستىعىنىڭ ورىنباسارى دانيار تاجىباەۆتىڭ حابارلاۋىنشا، جىل باسىنان بەرى «112» پۋلتىنە بالالاردىڭ تەرەزەدەن قۇلاۋى تۋرالى التى حابارلاما تۇسكەن. سپيكەردىڭ ايتۋىنشا، بۇعان باستى سەبەپ – بالالاردىڭ اتا-انا نازارىنان تىس قالۋى.
جاز مەزگىلىندە بالالاردىڭ سۋداعى قاۋىپسىزدىگىنە دە ەرەكشە نازار اۋدارىلادى. تجد مالىمەتىنشە، قايعىلى جاعدايلاردىڭ نەگىزگى سەبەبى – ارنايى جابدىقتالماعان ورىنداردا شومىلۋ جانە ۇلكەندەردىڭ نازارىنان تىس قالۋى.
وتىرىستا كامەلەتكە تولماعاندارعا پسيحولوگيالىق قولداۋ كورسەتۋ ماسەلەلەرى دە تالقىلاندى. اكىمدىكتىڭ پسيحولوگيالىق قولداۋ ورتالىعىنىڭ جەتەكشىسى گۇلميرا قاپانوۆا مەن قالالىق پسيحيكالىق دەنساۋلىق ورتالىعى ديرەكتورىنىڭ ورىنباسارى ەلەنا پوليەنكو جاسوسپىرىمدەردىڭ داعدارىستىق جاعدايلارىنىڭ الدىن الۋعا جانە ولارعا ۋاقىتىلى پسيحولوگيالىق كومەك كورسەتۋگە باعىتتالعان «جاسىل ءدالىز» جوباسىنىڭ ەنگىزىلۋى تۋرالى ايتىپ بەردى.
سونىمەن قاتار، وتىرىسقا قاتىسۋشىلار مەكتەپ وقۋشىلارىنىڭ جازعى دەمالىسىن ۇيىمداستىرۋ ماسەلەسىن قاراستىردى. ءبىلىم باسقارماسى باسشىسىنىڭ ورىنباسارى مارجانگۇل قايىرباەۆانىڭ اقپاراتى بويىنشا، ەلوردادا ۆەدومستۆوارالىق شتاب قۇرىلىپ، ول مەكتەپ جانىنداعى لاگەرلەردىڭ دايىندىعىن تەكسەرۋدى باستاپ كەتكەن.
بيىل جازعى دەمالىسقا جانە بوس ۋاقىتىن ءتيىمدى وتكىزۋ ءۇشىن مەكتەپ وقۋشىلارىنىڭ 98 پايىزىن، ياعني 1-10 سىنىپ ارالىعىنداعى 242 مىڭنان استام بالانى قابىلداۋ جوسپارلانىپ وتىر. ولاردىڭ ىشىندە الەۋمەتتىك وسال ساناتتاعى 11 مىڭعا جۋىق بالا بار.
وتىرىستى قورىتىندىلاي كەلە، ەسەت بايكەن بالالاردىڭ قاۋىپسىزدىگىن قامتاماسىز ەتۋ، اسىرەسە جازعى كانيكۋل كەزەڭىندە قۇقىعىن قورعاۋ قازاقستاننىڭ مەملەكەتتىك ساياساتىنىڭ بۇلجىماس باسىمدىعى بولىپ قالا بەرەتىنىن اتاپ ءوتتى.
