اقتوبە وبلىسىندا قىزىلشا اۋرۋى ۋشىعىپ بارادى. جىل باسىنان بەرى وبلىستىڭ مىڭنان استام تۇرعىنى قاۋىپتى دەرتكە شالدىققان. قازىر جانساقتاۋ بولىمىندە التى ءسابي جاتىر. ەمحانالارعا قوسىمشا توسەك-ورىندار سالىنۋدا، دەپ حابارلايدى "ادىرنا" ۇلتتىق پورتالى.
اقتوبە وبلىسىندا قىزىلشا اۋرۋىنىڭ العاشقى وقيعالارى اقپان ايىندا تىركەلە باستادى، دەپ جازادى Astanatv. اۋرۋ اسقىنعان ۋاقىت كۇزدە تىركەلىپ وتىر. بارلىق وتباسىلار ەمدەلۋگە اۋرۋحانالارعا جاتقىزىلادى. وسىعان وراي وبلىستاعى اۋرۋحانالارعا قوسىمشا توسەك-ورىندار ورنالاستىرىلدى.
"بۇگىندە بىزدە وبلىستا 211 توسەك، ەرەسەكتەر مەن بالالارعا ارنالعان وبلىستىق اۋرۋحانالاردا 91 جانە «چايكا» شيپاجايىندا 120 توسەك بار. سوڭعى 10 كۇندە بىزدە كۇنىنە ورتا ەسەپپەن 20 جاعداي تىركەلدى",
دەدى دەنساۋلىق ساقتاۋ باسقارماسى باسشىسىنىڭ ورىنباسارى باقىتجان تۇلكىباەۆ.
قازىر «چايكا» شيپاجايىندا 82 ادام ەمدەلۋدە. باسىم كوپشىلىگى بالالار. 6 ءسابي جانساقتاۋ بولىمىندە جاتىر. دارىگەرلەردىڭ ايتۋىنشا، اۋرۋ جۇقتىرعان بالالاردىڭ 70 پايىزدان استامى ەكپە الماعان. ال مۇنداي جاعدايلاردا اۋرۋ الدەقايدا اۋىر جۇرەدى. دارىگەرلەر قىزىلشانىڭ وتە جۇقپالى اۋرۋ ەكەنىن ەسكەرتەدى. ۆاكتسيناتسيالانباعان ادام ونى 100% ىقتيمالدىقپەن جۇقتىرۋى مۇمكىن. اۋرۋدىڭ ايتارلىقتاي تاراپ جاتقانىنا قاراماستان، وبلىستاعى بالاباقشالار مەن مەكتەپتەر كارانتينگە جابىلماعان. قىزىلشا انىقتالسا، جۇقتىرعان بالا وقشاۋلانادى، ال قالعان بالالار 21 كۇن بويى باقىلاۋدا بولادى.
