الماتىدا ءىز-ءتۇزسىز جوعالعان 25 جاستاعى ەرزات ەگىنبايدىڭ ءمايىتى تابىلدى، دەپ حابارلايدى «ادىرنا» ءتىلشىسى.
جاس جىگىتتى ىزدەۋگە الماتى قالالىق پوليتسيا دەپارتامەنتىنىڭ بارلىق جەكە قۇرامى جۇمىلدىرىلعان ەدى. سونىمەن قاتار، اۋماقتى تەكسەرۋ جانە ىزدەۋ پاراقتارىن تاراتۋ جۇمىستارىنا «قوعام» جانە «ليدەر KZ» ەرىكتىلەر ۇيىمدارىنىڭ مۇشەلەرى تارتىلعان.
«مارقۇمنىڭ تۋعان-تۋىستارى مەن جاقىندارىنا قايعىرىپ كوڭىل ايتامىز. بۇل قاسىرەتتى ەڭسەرۋگە زور كۇش پەن سابىر تىلەيمىز. ءبىزدىڭ ىزدەۋ جۇمىستارىمىز اياقتالدى… وكىنىشكە قاراي، قارالى حابارمەن…»، – دەپ جازدى ەرىكتىلەر 23 مامىردا.
ەرزات 19 مامىر كۇنى كۇندىز جەتىسۋ اۋدانىنداعى رايىمبەك داڭعىلى بويىندا ورنالاسقان قۇرىلىس نىسانىنان (147ب ءۇي ماڭى) شىعىپ كەتكەن. وسىدان كەيىن ول بايلانىسقا شىقپاعان. جوعالعان جىگىتتىڭ تەلەفونى سوڭعى رەت الماتى وبلىسى ەڭبەكشىقازاق اۋدانىندا، ەسىك ساياجايلارى مەن «كوكساي» ساياجاي سەرىكتەستىگى اۋماعىندا تىركەلگەن.
قازىرگى ۋاقىتتا ءولىمنىڭ ناقتى سەبەبى رەسمي تۇردە جاريالانعان جوق.
