تۋلسي گاببارد اقش پرەزيدەنتى دونالد ترامپقا قىزمەتتەن كەتۋ تۋرالى ءوتىنىش بەرگەنىن مالىمدەدى، دەپ حابارلايدى "ادىرنا" ۇلتتىق پورتالى DW-عا سىلتەپ.
بۇل تۋرالى ول X الەۋمەتتىك جەلىسىندەگى پاراقشاسىندا جازدى. گابباردتىڭ ايتۋىنشا، ول 2026 جىلدىڭ 30 ماۋسىمىنان باستاپ قىزمەتىنەن كەتەدى. بۇعان جولداسى ابراحامنىڭ سيرەك كەزدەسەتىن سۇيەك قاتەرلى ىسىگىنە شالدىققانى سەبەپ بولعان.
«امەريكا حالقىنا ۇلتتىق بارلاۋ ديرەكتورى رەتىندە قىزمەت ەتۋ مەن ءۇشىن ۇلكەن مارتەبە بولدى»، – دەپ جازدى تۋلسي گاببارد.
ءوز كەزەگىندە دونالد ترامپ ونىڭ قىزمەتىن جوعارى باعالاپ، گابباردتىڭ مىندەتىن ۋاقىتشا ونىڭ ءبىرىنشى ورىنباسارى اارون لۋكاس اتقاراتىنىن حابارلادى.
بۇعان دەيىن The Wall Street Journal گابباردتىڭ قىزمەتتەن كەتۋدى جوسپارلاپ وتىرعانىن جازعان ەدى. باسىلىم مالىمەتىنشە، ول اقش پەن ءيزرايلدىڭ يرانعا قاتىستى اسكەري ارەكەتتەرىن تالقىلاۋعا قاتىسپاعان جانە تاياۋ شىعىس جونىندەگى پىكىرلەرى ترامپ اكىمشىلىگىنىڭ رەسمي ۇستانىمىمەن سايكەس كەلمەگەن.
اتاپ ايتقاندا، تۋلسي گاببارد اقش پەن ءيزرايلدىڭ ايماقتاعى مۇددەلەرى ءارتۇرلى ەكەنىن ايتىپ، امەريكالىق بارلاۋ ورگاندارىندا يراننىڭ يادرولىق باعدارلامانى قايتا قالپىنا كەلتىرىپ جاتقانى تۋرالى ناقتى دالەل جوق ەكەنىن مالىمدەگەن. 2026 جىلدىڭ كوكتەمىندە The Guardian تا ترامپتىڭ گابباردتىڭ يرانعا قاتىستى ۇستانىمىنا كوڭىلى تولمايتىنىن حابارلاعان بولاتىن.
تۋلسي گاببارد يراكتاعى اسكەري قىزمەتتەن وتكەن جانە وتستاۆكاداعى پودپولكوۆنيك سانالادى. ۇلتتىق بارلاۋ باسقارماسىن باسقارعان كەزەڭدە ول ۆەدومستۆو شتاتتارىن قىسقارتىپ، بۇعان دەيىن قۇپيا ساقتالعان جارتى ميلليوننان استام ۇكىمەت قۇجاتىن جاريالاۋعا باستاماشى بولعان.
