Tulsi Gabbard AQŞ prezidentı Donald Trampqa qyzmetten ketu turaly ötınış bergenın mälımdedı, dep habarlaidy "Adyrna" ūlttyq portaly DW-ǧa sıltep.
Būl turaly ol X äleumettık jelısındegı paraqşasynda jazdy. Gabbardtyŋ aituynşa, ol 2026 jyldyŋ 30 mausymynan bastap qyzmetınen ketedı. Būǧan joldasy Abrahamnyŋ sirek kezdesetın süiek qaterlı ısıgıne şaldyqqany sebep bolǧan.
«Amerika halqyna Ūlttyq barlau direktory retınde qyzmet etu men üşın ülken märtebe boldy», – dep jazdy Tulsi Gabbard.
Öz kezegınde Donald Tramp onyŋ qyzmetın joǧary baǧalap, Gabbardtyŋ mındetın uaqytşa onyŋ bırınşı orynbasary Aaron Lukas atqaratynyn habarlady.
Būǧan deiın The Wall Street Journal Gabbardtyŋ qyzmetten ketudı josparlap otyrǧanyn jazǧan edı. Basylym mälımetınşe, ol AQŞ pen İzraildıŋ İranǧa qatysty äskeri äreketterın talqylauǧa qatyspaǧan jäne Taiau Şyǧys jönındegı pıkırlerı Tramp äkımşılıgınıŋ resmi ūstanymymen säikes kelmegen.
Atap aitqanda, Tulsi Gabbard AQŞ pen İzraildıŋ aimaqtaǧy müddelerı ärtürlı ekenın aityp, amerikalyq barlau organdarynda İrannyŋ iadrolyq baǧdarlamany qaita qalpyna keltırıp jatqany turaly naqty dälel joq ekenın mälımdegen. 2026 jyldyŋ köktemınde The Guardian ta Tramptyŋ Gabbardtyŋ İranǧa qatysty ūstanymyna köŋılı tolmaitynyn habarlaǧan bolatyn.
Tulsi Gabbard İraktaǧy äskeri qyzmetten ötken jäne otstavkadaǧy podpolkovnik sanalady. Ūlttyq barlau basqarmasyn basqarǧan kezeŋde ol vedomstvo ştattaryn qysqartyp, būǧan deiın qūpiia saqtalǧan jarty millionnan astam ükımet qūjatyn jariialauǧa bastamaşy bolǧan.
