2025 جىلى قازاقستاننىڭ رەسپۋبليكالىق بيۋدجەتىنىڭ كىرىستەرى جوسپارلانعان دەڭگەيدەن تومەن بولدى. بۇل تۋرالى ءماجىلىس وتىرىسىندا قارجى ۆيتسە-ءمينيسترى داۋرەن تەمىربەكوۆ مالىمدەدى، دەپ حابارلايدى “ادىرنا”.
ونىڭ ايتۋىنشا، بيۋدجەتكە كۇتىلگەن 21,4 تريلليون تەڭگەنىڭ ورنىنا شامامەن 21,1 تريلليون تەڭگە تۇسكەن. وسىلايشا، بيۋدجەت تاپشىلىعى 336 ميلليارد تەڭگەنى قۇرادى.
نەگىزگى تومەندەۋ سالىقتىق تۇسىمدەر بويىنشا بايقالدى — اسىرەسە كورپوراتيۆتىك تابىس سالىعى مەن قوسىلعان قۇن سالىعىنان (ققس) تۇسەتىن كىرىستەر ازايعان. جالپى سالىق تۇسىمدەرى جوسپارى 730 ميلليارد تەڭگەگە ورىندالماي قالدى.
شىعىنداردىڭ ءبىر بولىگى سالىقتىق ەمەس تۇسىمدەر ەسەبىنەن وتەلدى. بۇل باعىتتاعى كورسەتكىشتەر جوسپاردان شامامەن 388 ميلليارد تەڭگەگە ارتىق بولدى.
قارجى مينيسترلىگىندە بۇل جاعدايدى بىرنەشە فاكتورمەن ءتۇسىندىردى. اتاپ ايتقاندا، مۇنايدىڭ ورتاشا باعاسى بيۋدجەتتە قاراستىرىلعان دەڭگەيدەن 6 دوللارعا تومەن بولدى، بىرقاتار ەلدەرمەن ەكسپورت كولەمى 1,7 ميلليارد دوللارعا قىسقاردى، سونداي-اق قورعاسىن باعاسى 5 پايىزدان استام تومەندەدى.
بۇعان قوسا، گەوساياسي احۋال مەن ۇلتتىق ۆاليۋتانىڭ نىعايۋى دا اسەر ەتكەن. بيۋدجەتتە دوللار باعامى شامامەن 540 تەڭگە دەڭگەيىندە جوسپارلانعان بولسا، ناقتى باعام 497,7 تەڭگەنى قۇرادى. بۇل ۆاليۋتالىق تۇسىمدەردى تەڭگەگە ايىرباستاۋ كەزىندە بيۋدجەت كىرىستەرىنىڭ ازايۋىنا سەبەپ بولدى.
بۇعان دەيىن وتكەن جىلدىڭ قورىتىندىسى بويىنشا رەسپۋبليكالىق بيۋدجەت تاپشىلىعى 4,1 تريلليون تەڭگەگە جەتكەنى حابارلانعان ەدى.
