جەتىسۋ وبلىسىنداعى «التىنەمەل» مەملەكەتتىك ۇلتتىق تابيعي پاركىندە وتكەن «التىنەمەل – قۇلاندار مەكەنى» تۋريستىك جانە مادەني-ەكولوگيالىق فەستيۆالىنە مىڭنان استام ادام جينالدى. قاتىسۋشىلار قاتارىندا ۇلىبريتانيا، ءۇندىستان، فرانتسيا، رەسەيدەن، سونىڭ ىشىندە ياكۋتيادان قوناقتار، سونداي-اق استانا، الماتى، تالدىقورعان قالالارى مەن الماتى وبلىسىنىڭ تۇرعىندارى بار. بيىل فەستيۆال العاش رەت رەسپۋبليكالىق دەڭگەيدە ۇيىمداستىرىلدى. فەستيۆال اياسىندا سپورتتىق جۇگىرۋ جارىستارى، ەتنومادەني قويىلىمدار، ەجەلگى پەتروگليفتەرگە ەكسكۋرسيالار وتكىزىلىپ، قۇلانداردى تابيعي مەكەنىندە تاماشالاۋ مۇمكىندىگى جاسالدى. بۇگىندە تابيعي پاركتەگى قۇلاندار سانى 3500 باستان اسقان، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
فەستيۆالگە وبلىس اكىمىنىڭ ورىنباسارى مارلەن كولباەۆ، قر تۋريزم جانە سپورت مينيسترلىگىنىڭ وكىلدەرى، travel-بلوگەرلەر، ينفليۋنسەرلەر، جالپى ەكولوگيالىق تۋريزمگە قىزىعۋشىلار قاتىستى. ۇيىمداستىرۋشىلار - «التىنەمەل» مەملەكەتتىك ۇلتتىق تابيعي پاركى، وبلىستىق تۋريزم باسقارماسى، «Vizit Zhetysu» تۋريستىك اقپاراتتىق ورتالىعى.
ۇيىمداستىرۋشىلاردىڭ ايتۋىنشا، فەستيۆالدىڭ ماقساتى – ءوڭىردىڭ تۋريستىك الەۋەتىن ناسيحاتتاۋ.
- بۇل فەستيۆال – تۋريزم جانە سپورت مينيسترلىگىنىڭ ءىرى مادەني-تۋريستىك ءىس-شارالار كۇنتىزبەسىنە ەنگىزىلگەن ءۇش شارانىڭ ءبىرى. ونىڭ اۋقىمى جىل سايىن كەڭەيىپ كەلەدى. نەگىزگى ماقساتى – كەلۋشىلەردى ۇلتتىق پاركتىڭ بىرەگەي تابيعي جانە تاريحي-مادەني مۇراسىمەن تانىستىرۋ، سيرەك كەزدەسەتىن جانۋارلاردى قورعاۋعا نازار اۋدارۋ جانە تابيعاتتى ايالاۋدىڭ ماڭىزىن ناسيحاتتاۋ. جالپى، وبلىس اكىمى بەيبىت يساباەۆتىڭ باسشىلىعىمەن وڭىردە ءتۋريزمدى دامىتۋعا قاجەتتى شارالار قابىلدانىپ، تۋريستىك ينفراقۇرىلىمدى جەتىلدىرۋگە ەرەكشە كوڭىل بولىنۋدە. سونىڭ ناتيجەسىندە جەتىسۋ وبلىسىنا جىل سايىن 2 ميليونداي تۋريست كەلەدى، – دەدى مارلەن كولباەۆ.
بيىل فەستيۆال شولاق تاۋلارىنىڭ بوكتەرىندە 5 جانە 10 شاقىرىمدىق ەكو-جارىسپەن باستالدى. جارىسقا قاتىسۋشىلار بەلسەندى دەمالىس پەن ەكولوگيالىق مادەنيەتتى ۇشتاستىرا وتىرىپ، تاۋ لاندشافتارى اياسىندا جۇگىردى. جارىس جەڭىمپازدارى ارنايى مەدالدارمەن ماراپاتتالدى.
وسى كۇنى ۇلتتىق پاركتەگى ۆيزيت ورتالىق الاڭىندا دالالىق رۋحتاعى مادەني شارالار كورەرمەن نازارىنا ۇسىنىلدى. اتاپ ايتقاندا، كەۋشىلەر فەستيۆال ساحناسىنان «قىلىش اينالدىرۋ»، «ايبالتا شوۋىن» تاماشالاپ، كوشپەلىلەردىڭ جاۋىنگەرلىك ءداستۇرى كوپشىلىككە پاش ەتىلدى. سول سياقتى ونەرپازدار ۇلتتىق اسپاپتاردا ونەر كورسەتتى.
فەستيۆال قوناقتارى شولاق تاۋلارىنداعى ەجەلگى پەتروگليفتەرگە ەكسكۋرسياعا بارىپ، مىڭداعان جىل بۇرىن جارتاستارعا قاشالعان، جەتىسۋدىڭ كونە تاريحىنان سىر شەرتەتىن سۋرەتتەر مەن تاڭبالاردى كوردى.
سول سياقتى ۆيزيت-ورتالىق الاڭىندا پەتروگليفتەر مەن كونە تۇركى جازۋىنا جانە ءداستۇرلى قولونەرگە ارنالعان شەبەرلىك ساباقتارى، بالالارعا ارنالعان ويىندار مەن كۆەستتەر وتكىزىلىپ، قولونەر بۇيىمدارىنىڭ جارمەڭكەسى ۇيىمداستىرىلدى.
ءسويتىپ، فەستيۆال تابيعاتپەن بىرگە تىنىستاي وتىرىپ، ۇلتتىق مادەنيەتتى تانۋعا، تۋعان ولكەنىڭ تاريحىن سەزىنۋگە مۇمكىندىك بەرەتىن مادەني-تانىمدىق الاڭعا اينالادى.
كەلگەن قوناقتار ءىس-شارا تۋرالى وي-پىكىرلەرىن ءبىلدىردى.
- «التىنەمەل» ۇلتتىق پاركىنە ۆيزيت-ورتالىق اشىلعاندا ءبىرىنشى رەت كەلگەنمىن. بۇگىن ەكىنشى مارتە كەلىپ وتىرمىن. وسى فەستيۆالدىڭ وتەتىنى تۋرالى ينستاگرام الەۋمەتتىك جەلىسىنەن كورىپ، كۇيەۋىم ەكەۋىمىز الماتىدان ارنايى كەلدىك. تاڭەرتەڭ 5 شاقىرىمدىق كروسقا قاتىستىق. مارشرۋت وتە قىزىق بولدى. ءوزىم جارتاسقا ورمەلەۋمەن اينالىسامىن، سوندىقتان سپورتتىق شاراعا قاتىسۋ اسا قيىندىق تۋعىزعان جوق. بۇگىنگى فەستيۆالدا ەتنيكالىق اتموسفەرا بار، ەجەلگى تاريح تۋرالى سان قيلى فانتازياعا بەرىلدىك، كونە كوشپەلى حالىقتاردىڭ تىنىسىن سەزىندىك. سوندىقتان بۇل ساپار ماعان ەرەكشە اسەر ەتتى، - دەيدى الماتىلىق داريا نيكيشينا.
- تۋريستىك كومپانيا وكىلىمىن. ۇلتتىق پارككە العاش رەت كەلىپ وتىرمىن. ءوزىمىز تۋريستىك سالادا جۇرگەننەن كەيىن قازاقستاننىڭ تابيعاتى مەن تاريحىن ۇيلەستىرگەن وسىنداي كورنەكتى جەرلەرىن ناسيحاتتاۋعا اتسالىسايىق دەگەن ويىمىز بار، ونىڭ ۇستىنە فەستيۆالدى تاماشالاساق، قۇلانداردى كورسەك دەپ كەلدىك. ءوزىم SMM مامانىمىن، مەنىمەن بىرگە درونمەن ءتۇسىرىلىم جاساۋشى ازامات بىرگە كەلدى، ءبىز بەينەجازبالار ءتۇسىرىپ، وسى پاركتىڭ مۇمكىندىكتەرىن بارىنشا كەڭ تاراتساق دەيمىز، - دەيدى گۇلدانا قارشيگينا.
كەلۋشىلەردىڭ ىشىندە شەتەلدىك ازاماتتار دا بار.
- قازاقستانعا بۇل ەكىنشى رەت كەلۋىم. مەنى بۇل ەلدىڭ كوركەم تابيعاتى، ۇلتتىق مادەنيەتى قىزىقتىرادى. تۇرعىندارىنىڭ قوناقجايلىعى ەرەكشە. الەۋمەتتىك جەلىدەگى جازبالارىم ارقىلى ءوز وقىرماندارىما قازاقستاننىڭ كەرەمەتتەرى تۋرالى مول مالىمەت بەرىپ وتىرامىن، - دەيدى ۇلىبريتانيالىق دجورج كۋپەر.
ۇلتتىق پارك ماماندارى ءبىر كەزدەرى سانى كۇرت ازايىپ، قازاقستاننىڭ قىزىل كىتابىنا ەنگىزىلگەن قۇلانداردىڭ بۇگىندە «التىنەمەلدە» ارنايى باعدارلاما نەگىزىندە سانى كوبەيتىلىپ، ول پاركتىڭ تابيعي سيمۆولدارىنىڭ بىرىنە اينالعانىن ايتادى.
- بۇگىنگى فەستيۆالعا كەلۋشىلەرگە قۇلانداردى تابيعي ورتادا تاماشالاۋعا مۇمكىندىك جاسالىپ وتىر. ءبىر اتاپ وتەرلىگى، 1982 جىلى نەبارى 32 قۇلان بولسا، بيىل ولاردىڭ سانى 3 571 باسقا جەتتى. بۇل – تابيعاتتى قورعاۋ جۇمىستارىنىڭ ناقتى ناتيجەسى جانە سيرەك كەزدەسەتىن جانۋارلار پوپۋلياتسياسىن قالپىنا كەلتىرۋدىڭ جارقىن ۇلگىسى، – دەيدى «التىنەمەل» مەملەكەتتىك ۇلتتىق تابيعي پاركىنىڭ ديرەكتورى قۋات بايتۇرباەۆ.
جالپى، وڭىردە تۋريزم سالاسىن دامىتۋ 5 دەستيناتسياعا نەگىزدەلگەن، سونىڭ ءبىرى – ۇلتتىق پاركتەر. بىلتىر «التىنەمەل» مەملەكەتتىك ۇلتتىق تابيعي پاركىنە 32 مىڭ ادام كەلسە، سونىڭ 11 مىڭى – شەتەلدىكتەر.
