ءماجىلىس دەپۋتاتى ءابۋتالىپ ءمۇتالى قازاقستاننىڭ حالىقارالىق ترانزيتتەن تولىق پايدا كورە الماي وتىرعانىن مالىمدەدى، دەپ حابارلايدى "ادىرنا" ۇلتتىق پورتالى.
ونىڭ ايتۋىنشا، ەل تەك ترانزيتتىك ءدالىز ەمەس، قوسىمشا قۇن قالىپتاستىراتىن كولىك-لوگيستيكالىق حابقا اينالۋى قاجەت.
دەپۋتاتتىڭ سوزىنشە، بۇگىندە قازاقستان ارقىلى وتەتىن جۇك كولەمى ارتىپ كەلەدى. 2025 جىلدىڭ قورىتىندىسىندا ترانزيت كولەمى 36,9 ملن تونناعا جەتكەن. الايدا حالىقارالىق تاسىمالدان تۇسەتىن ميللياردتاعان دوللارلىق تابىس تولىق يگەرىلمەي وتىر.
ول قازىرگى Smart Cargo, لوگيستيكالىق پاسپورت، قاعازسىز قۇجات اينالىمى سەكىلدى جوبالار ءبىر-بىرىمەن بايلانىسپاي، بىتىراڭقى دامىپ جاتقانىن ايتتى. سونىمەن قاتار كاسىپكەرلەر جۇكتىڭ قوزعالىسىن تولىق باقىلاي المايتىنىن اتاپ ءوتتى.
ءمۇتالى حالىقارالىق تاجىريبەدە تابىس تەك ترانزيتتەن ەمەس، جۇك وڭدەۋ، قاپتاۋ، سەرتيفيكاتتاۋ جانە قايتا ەكسپورتتاۋ سياقتى قىزمەتتەردەن تۇسەتىنىن مىسالعا كەلتىردى. ول ءباا-دەگى دجەبەل-الي، سينگاپۋرداعى تۋاس جانە گەرمانياداعى دۋيسبۋرگ پورتتارىن اتادى.
وسىعان بايلانىستى دەپۋتات ۇكىمەتكە يندۋستريالىق-لوگيستيكالىق حابتاردىڭ ارنايى رەجيمىن ەنگىزۋدى، بارلىق لوگيستيكالىق جۇيەنى تسيفرلاندىرۋدى، الدىن الا تسيفرلىق تولەم ەسەپتەمەسىن جاساۋدى جانە 2035 جىلعا دەيىنگى ۇلتتىق دامۋ باعدارلاماسىن ازىرلەۋدى ۇسىندى.
ونىڭ پىكىرىنشە، بۇل شارالار قازاقستاننىڭ ترانزيتتىك ەلدەن قوسىلعان قۇن ەكونوميكاسى قالىپتاسقان لوگيستيكالىق دەرجاۆاعا اينالۋىنا مۇمكىندىك بەرەدى.
