قازاقستان پرەزيدەنتى قاسىم-جومارت توقاەۆ يۋنەسكو-نىڭ بۇرىنعى باس ديرەكتورى ودرە ازۋلەنە Qoja Ahmet Yasaui وردەنىن تابىستادى، دەپ حابارلايدى "ادىرنا" ۇلتتىق پورتالى.
ماراپاتتاۋ ءراسىمى استانادا ءوتتى.
مەملەكەت باسشىسى ودرە ازۋلەنىڭ يۋنەسكو-نى باسقارعان كەزەڭدەگى قىزمەتىنە جوعارى باعا بەرىپ، ونىڭ ۇيىمنىڭ حالىقارالىق ديالوگ پەن ىنتىماقتاستىق الاڭى رەتىندەگى ءرولىن كۇشەيتۋگە ۇلەس قوسقانىن اتاپ ءوتتى. پرەزيدەنتتىڭ ايتۋىنشا، ودرە ازۋلە ءبىلىم مەن مادەنيەتتى بەيبىتشىلىكتى نىعايتۋدىڭ ماڭىزدى قۇرالى رەتىندە دارىپتەپ كەلەدى.
سونداي-اق توقاەۆ ونىڭ قازاقستاننىڭ تاريحي-مادەني مۇراسىن حالىقارالىق دەڭگەيدە تانىتۋعا ەرەكشە ەڭبەك سىڭىرگەنىن ايتتى. پرەزيدەنت يۋنەسكو باعدارلامالارى ارقىلى الەم جۇرتشىلىعى قوجا احمەت ياساۋي كەسەنەسى مەن ۇلى دالانىڭ مادەني مۇراسىمەن كەڭىنەن تانىس بولعانىن جەتكىزدى.
ءوز كەزەگىندە ودرە ازۋلە كورسەتىلگەن قۇرمەت ءۇشىن العىس ايتىپ، قازاقستانعا العاشقى ساپارى قوجا احمەت ياساۋي كەسەنەسىمەن بايلانىستى بولعانىن ەسكە الدى. ونىڭ سوزىنشە، كەسەنەنىڭ تاريحي ءارى رۋحاني ماڭىزى ەرەكشە اسەر قالدىرعان.
