الەۋمەتتىك جەلى بەلسەندىسى تالعات بۇحارباەۆ اقىن، قازاقستاننىڭ حالىق جازۋشىسى مۇحتار شاحانوۆ جەرلەنگەن ورىننىڭ قازىرگى جاعدايىنا قاتىستى پىكىر ءبىلدىردى، دەپ حابارلايدى “ادىرنا” ۇلتتىق پورتالى politico.kz سايتىنا سىلتەپ.
بەلسەندىنىڭ ايتۋىنشا، اقىننىڭ زيراتى ورنالاسقان اۋماق ءالى قورشالماعاندىقتان، اينالاسى تاپتالىپ بارا جاتقان كورىنەدى. ول تۇركىستانعا قايتىپ كەلە جاتقان جولدا زيرات باسىنا ارنايى سوققانىن جازعان.
«كەشە كەشقۇرىم تۇركىستانعا قايتىپ كەلە جاتىپ، اقىن مۇحتار شاحانۇلى جاتقان زيراتقا سوققان ەدىك. ەندى باتىپ بارا جاتقان كۇنگە ءبىر مۇناراسى شاعىلىسقان زيراتتا كوپەن امىربەك اعامىز جاتىر ەكەن. جاتقان جەرلەرى جايلى، توپىراعى تورقا بولسىن. ۇلى اقىننىڭ باسىنا قىرقىندا تاس قويىلادى دەيدى. تەزىرەك قورشاپ قويماسا، اينالاسى تاپتالىپ بارا جاتقانداي كورىندى. ءزاۋلىم ءۇي تۇرعىزباسا دا، سول جاعىن ەسكەرسە ەكەن…»، – دەدى ول.
جەلى قولدانۋشىلارى بۇل ماسەلەگە قاتىستى ءتۇرلى پىكىر ءبىلدىردى. كەيبىرى ۋاقىتشا بەلگى ورناتىلعانىن ايتسا، ەندى ءبىرى زيراتتاعى جازۋدىڭ رەتكە كەلتىرىلۋى قاجەت ەكەنىن جەتكىزدى.
