Memleket basşysy Qasym-Jomart Toqaev öŋır elderınıŋ ekonomikalyq yntymaqtastyǧyn nyǧaitu, bırlesken infraqūrylymdyq jobalardy ıske asyru mäselelerı qauıpsızdıkpen tyǧyz bailanysty ekenın aitty. Būl turaly ol «Ortalyq Aziia – Qytai» formatyndaǧy elderdıŋ ışkı ıster jäne qoǧamdyq qauıpsızdık ministrlerın qabyldau kezınde aitty, dep habarlaidy "Adyrna".
Prezidenttıŋ pıkırınşe, bügınde Transkaspii halyqaralyq kölık baǧyty euraziialyq logistikanyŋ maŋyzdy strategiialyq elementıne ainalyp otyr. Alaida onyŋ qarqyndy damuy belgılı bır qauıp-qaterlerdı de qatar alyp keledı.
"Transkaspii halyqaralyq kölık baǧyty euraziialyq logistikanyŋ strategiialyq elementıne ainalyp keledı. Jahandyq sauda tızbegınıŋ transformasiiasyna jäne geosaiasi qysymnyŋ küşeiuıne säikes onyŋ maŋyzy eselep artty. Sonymen qatar jük tasymalyn ūlǧaitudyŋ belgılı bır qauıp-qaterlerı bar. Äŋgıme transūlttyq qylmys, sonyŋ ışınde kontrabanda, esırtkı, qaru-jaraq tasymaly turaly bolyp otyr", – dedı Prezident.
Memleket basşysy öŋırlık qauıpsızdıktıŋ tiımdı jüiesın qalyptastyru üşın "Ortalyq Aziia – Qytai" formatynyŋ äleuetın barynşa paidalanu qajet ekenın atap öttı.
Osyǧan bailanysty Prezident ışkı ıster ministrlıkterı arasyndaǧy özara ıs-qimyldy küşeitıp, qauıpsızdık pen qoǧamdyq tärtıpke qatysty aqparat almasudy jüieleu maŋyzdy ekenın jetkızdı.
"Menıŋ oiymşa, ışkı ıster ministrlıkterı bır-bırımen yntymaqtastyqty küşeitıp, qauıpsızdık jäne qoǧamdyq tärtıp mäselelerıne qatysty aqparattarmen bölısuge tiıs. Būl halyqtarymyzdyŋ arman-tılegıne tolyǧymen sai keledı. Jūrtşylyq memleketter basşylarynan öz elderın tärtıpke keltırıp, qalypty ärı qauıpsız ömırge qolaily jaǧdai jasau üşın asa şūǧyl, tiımdı şeşımder qabyldaudy talap etıp otyr", – dedı Qasym-Jomart Toqaev.
Sondai-aq Memleket basşysy azamattardyŋ özderın qauıpsız sezınuı üşın qoǧamdyq tärtıptı qamtamasyz etu baǧytyndaǧy naqty ärı zaŋǧa negızdelgen şaralar qabyldanuy qajet ekenın aitty.
"Balalarymyz, jalpy halyq el basşylarynyŋ, ışkı ıster ministrlerı men basqa da vedomstvo jetekşılerınıŋ zaŋǧa säikes qoǧamdyq tärtıptı saqtau şaralaryn qabyldap jatqandaryna közderı jetıp, özderın qauıpsız sezınuı qajet", – dedı Prezident.
Qasym-Jomart Toqaev Qazaqstannyŋ Qytai Halyq Respublikasymen jäne Ortalyq Aziia memleketterımen özara senım, tatu körşılık, ortaq jauapkerşılık negızındegı yntymaqtastyqty ılgerıletuge erekşe män beretının jetkızdı
Kezdesuge qatysuşylar özara bailanystardy jolǧa qoiuǧa, jedel aqparat almasuǧa, käsıbi qarym-qatynastardy damytuǧa jäne qūqyq qorǧau organdarynyŋ qyzmetıne zamanaui tehnologiialardy engızuge niettı ekenderın rastady.
Prezident atalǧan jiynnyŋ Ortalyq Aziia men Qytai aumaǧyndaǧy qauıpsızdıktı qamtamasyz etu boiynşa serıktestık pen yqpaldastyqqa tyŋ serpın beretınıne senım bıldırdı.
