ۋكراينا ورتالىق ازيا ەلدەرىمەن جاڭا وڭىرلىك فورمات قۇرۋعا مۇددەلى، دەپ حابارلايدى "ادىرنا" ۇلتتىق پورتالى فەرعاناعا سىلتەپ.
بۇل تۋرالى اندرەي سيبيگا Times of Central Asia باسىلىمىنا بەرگەن سۇحباتىندا مالىمدەگەن.
ءمينيستردىڭ ايتۋىنشا، كيەۆ «ۋكراينا + ورتالىق ازيا» فورماتىنداعى پلاتفورمانى تىكەلەي ديالوگ ورناتۋ جانە ءوزارا ءتيىمدى ىنتىماقتاستىقتى دامىتۋ قۇرالى رەتىندە قاراستىرادى.
"مۇنداي فورمات ەشكىمگە قارسى باعىتتالمايدى. ونىڭ نەگىزگى ماقساتى – تىكەلەي ديالوگتى جانداندىرىپ، پراكتيكالىق ءوزارا ءتيىمدى مۇمكىندىكتەردى ىزدەۋ", – دەدى ول. ۋكراينا تاراپى جاڭا الاڭنىڭ نەگىزگى باعىتى رەتىندە ترانزيتتىك-لوگيستيكالىق بايلانىستى اتادى. كيەۆ ترانسكاسپي حالىقارالىق كولىك دالىزىنە تولىققاندى قاتىسۋشى بولۋعا قىزىعۋشىلىق تانىتىپ وتىر. ۋكراينا قارا تەڭىز پورتتارىن «قىتاي – ورتالىق ازيا – كاسپي – وڭتۇستىك كاۆكاز – قارا تەڭىز – ەۋرووداق» باعىتىنىڭ باتىس قاقپاسى رەتىندە قاراستىرادى.
قازاقستان ۋكراينا ءۇشىن وڭىردەگى باستى سەرىكتەستەردىڭ ءبىرى بولىپ قالا بەرەدى. اندرەي سيبيگانىڭ سوزىنشە، ۇزاق ۇزىلىستەن كەيىن ەكى ەل اراسىنداعى ۆەدومستۆوارالىق كونسۋلتاتسيالار قايتا جاندانىپ، بىرلەسكەن بيزنەس-فورۋم وتكەن.
سونىمەن قاتار ۋكراينالىق كومپانيالار قازاقستان نارىعىنا قىزىعۋشىلىق تانىتىپ وتىر. اسىرەسە اۋىل شارۋاشىلىعى، تاماق ونەركاسىبى، ماشينا جاساۋ جانە IT سالالارىنداعى ىنتىماقتاستىققا باسىمدىق بەرىلۋدە.
مينيستر گۋمانيتارلىق باعىتتاعى بايلانىستى دا ەرەكشە اتاپ ءوتتى. ونىڭ ايتۋىنشا، ساياسي كەلىسىمدەردىڭ ءتيىمدى بولۋى ءۇشىن گۋمانيتارلىق قارىم-قاتىناستىڭ ماڭىزى زور.
رەسمي مالىمەتكە سايكەس، رەسەيدىڭ ۋكرايناعا قارسى سوعىسى باستالعالى بەرى قازاقستان ۋكرايناعا شامامەن 600 توننا گۋمانيتارلىق كومەك جىبەرگەن. ونىڭ ىشىندە ءدارى-دارمەك، گەنەراتورلار جانە ءبىرىنشى كەزەكتەگى قاجەتتى تاۋارلار بار.
