فوتو: وقۋ-اعارتۋ مينيسترلىگى
اقش-تىڭ Phoenix قالاسىندا Regeneron ISEF 2026 دۇنيەجۇزىلىك عىلىمي-ينجەنەرلىك كورمەسى اياقتالدى. الەمدەگى ەڭ بەدەلدى عىلىمي دوداعا بيىل 60-تان استام ەلدەن 1 700-گە جۋىق جاس زەرتتەۋشى قاتىستى. بۇل تۋرالى وقۋ-اعارتۋ مينيسترلىگى مالىمدەدى، دەپ حابارلايدى "ادىرنا".
قازاقستان اتىنان 7 وقۋشى بەس عىلىمي جوبانى ۇسىنىپ، ەل نامىسىن قورعادى. بايقاۋ قورىتىندىسىندا تاراز قالاسىنداعى زياتكەرلىك مەكتەبىنىڭ 11-سىنىپ وقۋشىسى ارنۇر ارتىقباي ارنايى جۇلدەلەرمەن ماراپاتتالدى.
ول «ماشينالىق وقىتۋ نەگىزىندە قاتەرلى ىسىكتەردى اۆتوماتتى تۇردە انىقتاۋ جۇيەسى» اتتى عىلىمي جوباسىمەن MAWHIBA Foundation قورىنىڭ 400 دوللار كولەمىندەگى اقشالاي سىيلىعىن جانە ساۋد ارابياسىنىڭ كورول فاحد اتىنداعى مۇناي جانە پايدالى قازبالار ۋنيۆەرسيتەتىنە (KFUPM) ءبىلىم بەرۋ گرانتىن يەلەندى. جوبا جاساندى ينتەللەكت تەحنولوگيالارىن پايدالانۋ ارقىلى قاتەرلى ىسىكتەردى ەرتە ءارى ءدال انىقتاۋعا باعىتتالعان.
Regeneron ISEF – مەكتەپ وقۋشىلارى اراسىندا وتكىزىلەتىن الەمدەگى ەڭ ءىرى عىلىمي-ينجەنەرلىك كورمەلەردىڭ ءبىرى. بۇل بايقاۋدى حالىقارالىق ۇيىمدار مەن ءىرى تەحنولوگيالىق كومپانيالار قولدايدى. سولاردىڭ قاتارىندا MAWHIBA Foundation قورى بار. بۇل قور ساۋد ارابياسىندا دارىندى بالالار مەن جاس عالىمداردى قولداۋعا باعىتتالعان جانە عىلىم، تەحنولوگيا مەن يننوۆاتسيا سالالارىنداعى تالانتتاردىڭ حالىقارالىق دەڭگەيدە دامۋىنا جاعداي جاسايدى. قازاقستان 1999 جىلدان بەرى وسى حالىقارالىق بايقاۋعا ۇلتتىق سەرىكتەس رەتىندە تۇراقتى قاتىسىپ كەلەدى. قازاقستاننىڭ قاتىسۋى جاستاردىڭ عىلىمي-زەرتتەۋ جۇمىستارىنا قولداۋ كورسەتۋ جانە حالىقارالىق تاجىريبە الماسۋعا مۇمكىندىك بەرەدى.
