شىمكەنتتە مۇگەدەكتىگى بار ازاماتتارعا ارنالعان 150 ورىندىق جاڭا وڭالتۋ ورتالىعى اشىلدى. ءىس-شاراعا قالا اكىمى عابيت سىزدىقبەكوۆ قاتىستى.
جاڭا الەۋمەتتىك نىسان مەملەكەت باسشىسىنىڭ تاپسىرماسىنا سايكەس، زاماناۋي وڭالتۋ ورتالىقتارىنىڭ جەلىسىن دامىتۋ اياسىندا، بوزارىق شاعىناۋدانىندا سالىندى. قۇرىلىسى 2024 جىلدىڭ جەلتوقسانىندا باستالىپ، مەرزىمىنەن بۇرىن اياقتالىپ وتىر.
نىسان 5,3 گەكتار اۋماقتا ورنالاسقان. عيماراتتاردىڭ جالپى اۋدانى شامامەن 22 مىڭ شارشى مەتردى قۇرايدى. كەشەن مەديتسينالىق، وڭالتۋ، سپورتتىق، الەۋمەتتىك جانە تۇرعىن ينفراقۇرىلىمدى بىرىكتىرەتىن بەس بلوكتان تۇرادى.
ورتالىق I جانە II توپتاعى مۇگەدەكتىگى بار ازاماتتارعا جارتىلاي ستاتسيونارلىق فورماتتا ارناۋلى الەۋمەتتىك قىزمەت كورسەتۋگە ارنالعان.
قالا اكىمى ورتالىقتىڭ اشىلۋى مەملەكەت باسشىسىنىڭ تاپسىرماسىن ورىنداۋدىڭ ماڭىزدى ناتيجەسى ەكەنىن اتاپ ءوتىپ، ونىڭ قالا تۇرعىندارىنا ساپالى وڭالتۋ كومەگىن الۋعا مۇمكىندىك بەرەتىنىن ايتتى.
«پرەزيدەنتتىڭ تاپسىرماسىنا سايكەس شىمكەنتتە مۇگەدەكتىگى بار ازاماتتار كەشەندى كومەك الىپ، قولايلى جاعدايدا وڭالتۋدان وتە الاتىن زاماناۋي ورتالىق اشىلدى. مۇندا دەنساۋلىقتى قالپىنا كەلتىرۋگە، الەۋمەتتىك بەيىمدەلۋگە جانە بەلسەندى ومىرگە ورالۋعا بارلىق مۇمكىندىك جاسالعان»، – دەدى عابيت سىزدىقبەكوۆ.
كەشەن قۇرامىندا ءۇش قاباتتى وڭالتۋ كورپۋسى، ەمدىك-ساۋىقتىرۋ باسسەينى، سپورت جانە اكت زالدارى، ەكى قاباتتى ستاتسيونار، اسحانا، شەبەرحانالار جانە باسقا دا قاجەت بولمەلەر قاراستىرىلعان.
وڭالتۋ كورپۋسىندا دارىگەرلەر مەن مامانداردىڭ كابينەتتەرى، فيزيوتەراپيا، مەحانوتەراپيا، ماسساج، سۋمەن ەمدەۋ، لوگوپەديالىق جانە پسيحولوگيالىق كومەك كورسەتۋگە ارنالعان بولمەلەر ورنالاسقان. الەۋمەتتىك جانە ەڭبەككە بەيىمدەۋ ماقساتىندا تىگىن، قىش جانە سلەسارلىق شەبەرحانالار، شىعارماشىلىقپەن اينالىسۋعا ارنالعان بولمەلەر مەن كىتاپحانا قاراستىرىلعان.
دەنە وڭالتۋىنا دا ەرەكشە كوڭىل بولىنگەن. ەمدىك-ساۋىقتىرۋ باسسەينى ءبىر مەزەتتە – 46 ادامعا دەيىن، ال سپورت زالى 25 ادامعا دەيىن قابىلداي الادى. اكت زالى 150 ورىنعا ەسەپتەلگەن، ونىڭ ىشىندە مۇگەدەكتىگى بار ادامدار پايدالاناتىن اربالارعا ارنالعان 40 ورىن بار.
قىزمەت الۋشىلاردىڭ ۋاقىتشا تۇرۋى ءۇشىن ءبىر جانە ەكى ورىندى بولمەلەردەن تۇراتىن ەكى قاباتتى ستاتسيونار جاساقتالعان. ولاردىڭ اراسىندا مۇگەدەك ارباسىن پايدالاناتىن ازاماتتارعا ارنايى بەيىمدەلگەن بولمەلەر دە بار.
ورتالىق وتاندىق جانە شەتەلدىك ءوندىرىستىڭ زاماناۋي مەديتسينالىق جابدىقتارىمەن، ونىڭ ىشىندە ارنايى تەحنيكامەن قامتاماسىز ەتىلگەن. قاجەت پروتسەدۋرالار اياقتالعان سوڭ ورتالىق ازاماتتاردى قابىلداۋدى باستايدى.
ايتا كەتەيىك، ورتالىقتىڭ اشىلۋى شىمكەنت تۇرعىندارىنىڭ وڭالتۋ جانە ارناۋلى الەۋمەتتىك قىزمەتتەرگە قولجەتىمدىلىگىن كەڭەيتىپ، مۇگەدەكتىگى بار ازاماتتاردىڭ دەنساۋلىعىن قالپىنا كەلتىرۋى مەن الەۋمەتتىك بەيىمدەلۋىنە قوسىمشا مۇمكىندىك بەرەدى.
