رەسەيلىك دەپۋتات ولەگ كولتاشوۆ ءوز ءوڭىرىنىڭ بيدايىن ەكسپورتتاۋ ءۇشىن قازاقستاندا كومپانيا اشتى، دەپ حابارلايدى “ادىرنا” ۇلتتىق پورتالى Ulysmedia.kz -عا سىلتەمە جاساپ.
"قازاقستان رەسپۋبليكاسىندا تىركەلگەن ەنشىلەس كومپانيا ىسكە قوسىلدى جانە بەلسەندى جۇمىس ىستەپ جاتىر. ول حالىقارالىق ترانزيتتىك ءتاريفتىڭ بولۋىنا بايلانىستى ءبىزدىڭ ءوڭىر ءۇشىن وسى ۋاقىتقا دەيىن جابىق بولعان ورتا ازيا نارىقتارىنا ءداندى داقىلداردى ساتۋمەن جانە ساتىپ الۋمەن اينالىسادى", - دەدى كولتاشوۆ جاڭا جوبا تۋرالى.
باسىلىم كاسىپكەردىڭ ەلەۆاتورلار مەن استىق قابىلداۋ كاسىپورنىنا يەلىك ەتەتىندىگىن اتاپ ءوتتى.
ايتا كەتەيىك، كولتاشوۆ – قورعان وبلىستىق دۋماسىنىڭ دەپۋتاتى.
كومپانيا كەڭسەسى پەتروپاۆلدا اشىلعان، ويتكەنى بۇل – قورعان قالاسىنا ەڭ جاقىن ورنالاسقان قالا.
"قويما جانە ەلەۆاتورلار تولىپ كەتتى، قازىرگى ۋاقىتتا قولدانىستاعى وتكىزۋ نارىقتارى داقىلداردى جەدەل جونەلتۋدى قامتاماسىز ەتە المايدى. سوندىقتان قورعان شارۋالارى ەگىندى ساقتاۋدا قيىندىقتارعا تاپ بولماس ءۇشىن جاڭا باعىت اشۋعا تۋرا كەلدى", - دەيدى كولتاشوۆ.
